Myugariro Marcelo arashinjwa gusuzugura umutoza we Zinedine Zidane mu myitozo ya nyuma Real Madrid yakoze yitegura umukino wa shampiyona na Granada uraba kuri uyu wa kane.

Uyu munya Brazil umaze imyaka myinshi ari umukinnyi ngenderwaho muri Real Madrid aravugwaho kutumvikana na Zidane byatumye akurwa mu bakinnyi 18 nubwo nta makuru abishimangira yatanzwe n’ikipe.

Kubura kwa Marcelo guteye impungenge abafana cyane ko uwo bakina ku mwanya umwe Ferland Mendy atazongera gukina muri uyu mwaka w’imikino kubera imvune.

Ikinyamakuru Goal cyavuze ko uyu Marcelo atagaragara mu mukino wa Granada kubera gushwana na Zidane.

Bivugwa ko Marcelo atashimishijwe n’uburyo bwo kugarira umutoza Zidane yakoresheje mu byumweru bishize bwatumye batsindwa na Chelsea.

Real Madrid yakinishije ba myugariro 5 mu mukino ubanza n’uwo kwishyura wa ½ cya Champions League batsinzwemo na Chelsea.

Ndetse mu mukino wa La Liga,Real Madrid yategereje igitego cyo kwishyura ku munota wa 94 kugira ngo ikure inota kuri Sevilla.

Marcelona ntabwo agaragara muri 18 kandi barakina n’ikipe igoye ya Granada, ishobora kubahagama bigatuma Atletico Madrid ikomeza kongera amanota ibarusha.

Uku gushwana kwa Marcelo na Zidane kuri kuvugwa mu gihe uyu mukinnyi wageze muri Real madrid muri 2007 avuye muri Fluminense ashobora kwigendera.