Umunyapolitiki Martin Fayulu utavuga rumwe n’ubutegetsi bwa RDC, yibasiye Perezida Félix Antoine Tshisekedi nyuma yo kugaragara akina mu izamu.

Sponsored Ad

Ku mugoroba wo ku wa Kabiri tariki ya 3 Ukuboza ni bwo Tshisekedi yagaragaye akina mu izamu, mu mukino wa gicuti wahuje abanyapolitiki bo muri RDC n’abakanyujijeho muri ruhago y’iki gihugu. Ni umukino wabereye kuri Stade des Martyrs i Kinshasa.

Nyuma yawo Fayulu yumvikanye anenga mukeba we ku kuba yagiye gukina umupira w’amaguru, nyamara intambara ikomeje guca ibintu mu burasirazuba bwa Congo aho ingabo z’iki gihugu zikomeje kurwanira n’inyeshyamba zo mu mutwe wa M23.

Ni Fayulu washimangiye ko Tshisekedi yifitiye umuhamagaro wo guconga ruhago aho kuba Umukuru w’Igihugu.

Yagize ati: "Icyakabaye ingenzi ni ugushaka uko tubohoza uduce twa Congo. Uyu munsi hari uduce turenga 100 twinjiye mu maboko y’u Rwanda. Bwana Tshisekedi yagiye gukina umupira w’amaguru, mu gihe akina nta bantu bari muri Stade kubera ko abanye-Congo babona bisebetse."

Yunzemo ati: "Birashoboka ko Bwana Tshisekedi yahombewe n’umuhamagaro we. Umuhamagaro we si uwo kuba Perezida kuko nta byo ashoboye. Birashoboka ko umuhamagaro we ari uwo kuba umunyezamu w’ikipe y’umupira w’amaguru aho kuba Perezida wa Repubulika".

Ni Fayulu wongeye gushimangira ko Tshisekedi agomba kuva ku butegetsi ubwo manda ye izaba irangiye, n’ubwo Perezida wa RDC kuri ubu arajwe ishinga no guhindura itegeko nshinga ry’iki gihugu.