Mugisha François ‘Master’ yijeje abafana ko Rayon Sports yiteguye neza ndetse yiteguye kubashimisha mu mukino wo kwishyura wo kwerekeza mu matsinda ya CAF Confederation Cup bazahura na Al Hilal Benghazi,ejo saa 18:00.

Ibi yabitangaje mu kiganiro n’Itangazamakuru kigaruka ku mukino wo kwishyura iyi Kipe izakiramo Al Hilal Benghazi mu Ijonjora rya Kabiri rya CAF Confederation Cup, uteganyijwe ku wa Gatandatu, tariki ya 30 Nzeri 2023.

Mugisha ’master’ yavuze ko ikipe ya Rayon Sports yagiye mu matsinda muri 2018, ntaho itaniye n’ihari kuko zose zifite abakinnyi beza n’abayobozi babashyigikiye.

Mugisha ’master’ yavuze ko umukino ubanza bagowe no kubura abafana, abahamagarira kuzaza ku bwinshi muri uyu mukino wo kwishyura.

Abajijwe ku byavuzwe ko hari abakinnyi yavuzwe ko hari abakinnyi banyuzwemo kugira ngo bagurishe umukino wa Al Hilal SC, Mugisha François ‘Master’,yagize ati "Uyu n’umukino buri wese azi agaciro kawo.Abakinnyi benshi ibyo bintu twagiye tubyumva,gusa ikipe nka Rayon Sports iyi igiye gukina umukino nk’uyu ntihabura amakuru avuga ko abakinnyi bariye,umukino wagurishijwe n’ibindi.

Kugurisha umukino n’ukugurisha ibyishimo by’abafana bose ba Rayon Sports."

Uyu yakomeje avuga ko nta mafaranga wabona waha umukinnyi ngo yitsindishe ku mukino nk’uyu nguyu ukomeye.

Mohamed WADE,Umutoza wungirije wa Rayon Sports yagize ati“Turasaba abafana ba Rayon Sports kutubera umukinnyi wa 12. Umurindi wabo udutera ingabo mu bitugu kandi dufite icyizere cyo kubahesha ishema.”

Uyu kapiteni wungirije wa Rayon Sports yifurije intsinzi ikipe ya APR FC,aho yavuze ko nayo igeze mu matsinda byaba ari inyungu ku gihugu.

Master ati, “ Twese dusohotse,umwaka utaha igihugu cyabyungukiramo hagasohoka amakipe 4,urumva ni ibintu byiza ku gihugu.

Turabifuriza ibyiza,nyagasani ababe hafi.Nibiza kugenda neza ku ruhande rwabo turishima nk’igihugu."