Ikipe ya Mukura VS yongeye gutsindira Rayon Sports imbere y’abakunzi bayo I Kigali mu mukino w’umunsi wa kabiri wa shampiyona,ibitego 2-1.

Mukura VS ibifashijwemo na Ndizeye Innocent yakuye mu Magaju uyu mwaka,yatsinze Rayon Sports mu mukino w’umunsi wa kabiri wa shampiyona wabereye kuri stade ya Kigali I Nyamirambo.

Ibitego bibiri bya Mukura VS byose byinjiye mu gice cya mbere bitsinzwe na Ndizeye Innocent,byose byaturutse ku burangare bwa ba myugariro ba Rayon Sports batari mu mukino wo kuri iki Cyumweru.

Ndizeye Innocent wakiniraga Mukura VS umukino we wa mbere muri shampiyona, yigaragaje nyuma yo kuva mu Amagaju Fc.

Nubwo Rayon Sports yagarutse mu gice cya kabiri yahindutse ndetse Manzi Thierry Thierry akayishyurira igitego kimwe,ntibyayibujije gutakaza uyu mukino uje wiyongera ku ku wa final batsindiwe na Mukura VS kuri penaliti 3-1.

Mukura VS igize amanota 6 kuri 6 cyane ko mu mukino wa mbere bari bakiriye I Huye, yatsinze Sunrise igitego 1-0.

Rayon Sports yakinnye uyu mukino idafite myugariro Rutanga Eric wari ufite ikibazo cy’Uburwayi ndetse na Irambona Eric utarahabwa amasezerano byatumye Nyandwi Saddam ariwe bahahengeka.

Rayon Sports yaherukaga gtsindwa na Mukura VS muri shampiyona muri 2012 ubwo yatozwaga na Ruremesha uri muri Musanze.