Myugariro w’inyuma ku ruhande rw’ibumoso, Ben Chilwell wakiniraga Leicester City yamaze kwerekeza mu ikipe ya Chelsea kuri miliyoni 50 z’amapawundi,aba umukinnyi wa 3 iyi kipe yo mu mujyi wa London iyi kipe isinyishije.

Nkuko ikipe ya Chelsea yamaze kubitangaza ku mbuga zayo,Ben Chilwell bari bamaze iminsi bifuza yasinye amasezerano y’imyaka 5 nyuma yo kumvikana n’iyi kipe ya Frank Lampard.

Umutoza Lampard yafashe umwanzuro wo kugura uyu Mwongereza nyuma y’aho mu mwaka we wa mbere afashe iyi kipe yatengushywe cyane na Marcos Alonso na Emerson Palmieri.

Chilwell w’imyaka 23 yigaragaje cyane mu mwaka w’imikino ushize ubwo yafashaga Leicester kumara igihe iri mu makipe 3 ya mbere nubwo yaje kurangiza ku mwanya wa 05.

Chilwell yabwiye urubuga rwa Chelsea ati “Ndishimye kuba nerekeje mu ikipe ya Chelsea muri iki gihe cyayo cyiza.

Sinjye uzarota dutangira gukina kandi nizeye ko bitazatinda ngo dukinire imbere y’abafana I Stamford Bridge."

Umuyobozi wa Chelsea ushinzwe kugura abakinnyi, Marina Granovskaia we yagize ati “Twishimiye kuba twongereye umukinnyi wa 3 mu ikipe yacu nziza twizeye mu mwaka w’imikino utaha.

Ben azanya ubunararibonye bwinshi bwo muri Premier League, Champions League n’imikino mpuzamahanga nubwo akiri muto.Twizeye neza ko azisanga vuba na bwangu mu ikipe ya Chelsea cyane ko ingengabihe y’umwaka wa 2020/2021 igoranye.N’inyongera nziza mu ikipe yacu dukeneye ko itwara ibikombe.”

Chilwell yatangiye gukina mu ikipe ya mbere ya Leicester ubwo yari afite imyaka 18,ubwo yatwaraga igikombe ku bwa Claudio Ranieri akaba yayivuyemo ayikiniye imikino 123.

Chilwell yiyongereye kuri Hakim Ziyech, Timo Werner, n’umukinnyi muto Xavier Mbuyamba.

Chelsea iri hafi gusinyisha Thiago Silva ku buntu ndetse amakuru avuga ko yamaze kumvikana na Kai Havertz wa Leverkusen.