Niyibizi Ramadhan usoje amasezerano muri APR FC, yahawe ubutumire n’Ikipe ya Cavalry FC yo muri Canada ngo azakore igerageza kuva tariki ya 21 Nyakanga kugeza ku ya 21 Kanama 2025.

Sponsored Ad

Iyi baruwa yanditswe n’Umuyobozi Mukuru wa Cavalry FC, Tofarati Fakunle, ivuga ko uyu mukinnyi azitabwaho mu gihe azaba ari mu igerageza, ndetse niyitwara neza akaba azahabwa amasezerano.

Igira iti: “Twishimiye koherereza ubutumire Niyibizi Ramadhan, ukinira APR FC mu Rwanda. Atumiwe mu igeragezwa rizakorerwa muri Cavalry Football Club, ikina muri Shampiyona y’Icyiciro cya Mbere muri Canada. Ni igerageza rizahera tariki ya 21 Nyakanga kugeza tariki ya 21 Kanama 2025.”

Ibaruwa ikomeza igira iti: “Uko azitwara muri iri gerageza ndetse n’ibizamini by’ubuzima bikagaragaza ko ameze neza, azahabwa amasezerano yemewe yo gukinira iyi kipe.”

‎‎Cavalry FC yashinzwe muri 2018 ikaba yakirira imikino yayo ku kibuga cya ATCO Field gifite ubushobozi bwo kwakira abantu ibihumbi 6.

‎‎Iyi kipe ni yo ifite igikombe cya shampiyona cyo mu mwaka ushize wa 2024 naho kugeza ubu ho iri ku mwanya wa 3 ku rutonde rwa shampiyona.

‎Niyibizi Ramadan yageze muri APR FC mu 2022 avuye muri AS Kigali yagezemo avuye muri Etincelles FC.