skol
Kigali

Nizeyimana Mugabo Olivier yatorewe kuba Perezida wa FERWAFA

Imyidagaduro   Yanditswe na: Dusingizimana Remy 27 June 2021

MUGABO Nizeyimana Olivier yatorewe kuyobora Komite Nyobozi ya FERWAFA ku bwiganze busesuye bw’amajwi 52 kuri 59 y’abitabiriye aya matora yabereye kuri Lemigo Hoteli.


Mugabo Nizeyimana Olivier, ni we watorewe kuyobora Ishyirahamwe ry’Umupira w’Amaguru mu Rwanda,FERWAFA, nyuma yo kwiyamamaza wenyine kuko Rurangirwa Louis bari bahanganye yakuyemo kandidatire ye habura iminota mike ngo amatora atangire.

Aya matora yarangiye Nizeyimana Olivier Mugabo agize amajwi 52.Uwatoye oya n’umwe mu gihe impfabusa zabaye 6.

Nizeyimana yasabwaga amajwi 31 gusa ngo atorerwe kuyobora FERWAFA nyuma y’aho Rurangirwa Louis avugiye muri iyi nama ko atacyiyamamaje kuko hari itegeko ritubahirijwe.

Rurangirwa yashingiye ku Itegeko Ngenga rihindura kandi ryuzuza Itegeko Ngenga nº 61/2008 ryo ku wa 10/09/2008 rigena imyitwarire y’Abayobozi mu nzego za Leta.

Ingingo ya 10 yaryo ivuga ko "Umuyobozi urebwa n’iri tegeko ngenga yemerewe kuba umunyamuryango w’umuryango utari uwa Leta. Icyakora ntiyemerewe kuyobora umuryango utari uwa Leta keretse igihe uwo muryango ugizwe gusa n’abayobozi barebwa n’iri tegeko ngenga cyangwa se ari umwihariko wabo nubwo hakwiyongeraho abandi bantu baterabwa n’iri tegeko ngenga."

Rurangirwa Louis agendeye ku iryo tegeko yemeje ko mu itsinda rya Nizeyimana Mugabo Olivier harimo Lt Col Dr Gatsinzi Herbert usanzwe ari umusirikare mu Ngabo z’u Rwanda na Gasana Richard usanzwe ari Meya w’Akarere ka Gatsibo, kandi aba bombi batemerewe kubangikanya akazi ka Leta n’indi mirimo nk’uko itegeko ribivuga.

Kalisa Adolphe uyobora Komisiyo y’Amatora,yasubije Rurangirwa ko nta kibazo aba bantu yavuze bafite kuko basuzumwe na komisiyo y’amatora.

Nyuma y’igikorwa cyo kubara amajwi, Komisiyo y’Amatora yemeje ko Nizeyimana Olivier Mugabo ari we watorewe kuyobora FERWAFA mu gihe cy’imyaka ine iri imbere.

Mugabo Olivier Nizeyimana abaye Perezida mushya wa FERWAFA nyuma y’imyaka 10 ayobora Mukura VS gusa byitezwe ko ahita yegura ku mwanya wo kuyobora iyi kipe yo mu karere ka Huye.

Muri iyi myaka yose amaze ayobora Mukura VS, intsinzi ikomeye yagezeho niyo muri 2018 ubwo iyi kipe yegukanaga igikombe cy’Amahoro.

Nizeyimana Olivier kandi akaba ari nyiri kompanyi itwara abagenzi ya Volcano Ltd akaba ahagarariye kompanyi ikora amamodoka ya Hyundai mu Rwanda.

Komite Nyobozi nshya ya FERWAFA mu myaka ine iri imbere:

Perezida: Mugabo Nizeyimana Olivier
Visi Perezida: Habyarimana Marcel
Komiseri ushinzwe Umutungo:Habiyakare Chantal
Komiseri ushinzwe Iyamamazabikorwa no gushaka abaterankunga: Cyamwenshi Arthur
Komiseri ushinzwe Amarushanwa: Gasana Richard
Komiseri ushinzwe Umutekano: IP Umutoni Chantal
Komiseri ushinzwe Tekinike n’Iterambere rya ruhago: Nkusi Edmond Marc
Komiseri ushinzwe Umupira w’abagore: Tumutoneshe Diane
Komiseri ushinzwe Amategeko: Uwanyirigira Delphine
Komiseri w’Ubuvuzi: Lt Col Mutsinzi Hubert

Aba biyongeraho Komiseri ushinzwe Imisifurire, Rurangirwa Aaron, watowe mu Nteko Rusange yo mu Ukwakira 2020, asimbuye Gasingwa Michel.

Amatora ya FERWAFA yabaye amezi atandatu mbere y’igihe cyari giteganyijwe bitewe n’uko Rtd Brig Gen Sekamana Damascène wari umaze imyaka itatu ayoboye iri shyirahamwe, yeguye muri Mata uyu mwaka.

Mu kwezi gushize nabwo heguye abakomiseri batanu, bituma Komite Nyobozi isigaramo abantu batanu badashobora gufata ibyemezo.



Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Messi yahishuye amakipe aha amahirwe yo kugora PSG muri UEFA Champions...

Umunyabigwi mu mupira w’amaguru ukinira PSG, Lionel Messi, yashyize...
14 October 2021 0

Ombolenga agiye kumara ukwezi kose adakinira APR FC

Omborenga Fitina, umunyarwanda ukina ku ruhande rw’iburyo yugarira muri APR...
14 October 2021 0

Wa munya Brazil waje gukinira Rayon Sports yavuze intego ikomeye imuzanye...

Rutahizamu ukomoka muri Brazil,Chrismar Malta Soares,waje gukinira Rayon...
14 October 2021 1

Agnes Tirop wahagarariye Kenya mu mikino Olimpike i Tokyo yiciwe mu rugo...

Ibitangazamakuru byo mu gihugu cya Kenya biri kuvuga cyane ku rupfu rwa...
13 October 2021 0

N’golo Kante yakoze ku mutima abakozi bo muri Resitora yagiye gufatiramo...

N’golo Kante yongeye kwerekana ko ari we mukinnyi wicisha bugufi kurusha...
13 October 2021 0

Edinson Cavani yasabwe gukora ikintu gikomeye kubera Cristiano...

Rutahizamu Edinson Cavani yasabwe kuva muri Manchester United kubera ko...
13 October 2021 0