Umutoza w’Ikipe y’Igihugu ya Uganda, Paul Joseph Put, yakuye Denis Omedi na Hakim Kiwanuka mu bakinnyi iki gihugu kizifashisha muri CHAN 2024 nyuma y’uko bombi bamaze gusinyira APR FC.

Sponsored Ad

Ku wa Gatatu tariki ya 8 Mutarama 2025, ni bwo APR FC yemeje ku mugaragaro ko yasinyishije Denis Omedi wakiniraga ikipe ya Kitara muri Uganda na Hakim Kiwanuka yakuye muri SC Villa, abakinnyi bombi bakina basatira baciye ku mpande.

Nyuma yo kubasinyisha hari amakuru yavugaga ko iyi kipe yegerewe na Federasiyo ya Uganda basaba ko bakwemera ko aba basore bombi bazagaragara mu mikino ya CHAN cyane ko ari bamwe mu nkingi za mwamba z’iyi kipe y’umutoza Paul Put.

Mu rutonde rw’abakinnyi bitabiriye imyitozo yo kuri uyu wa Mbere ntibarimo Denis Omedi na Hakim Kiwanuka baherutse gusinyira APR FC amasezerano y’imyaka ibiri.

Irushanwa rya CHAN 2024 riteganyijwe kuba tariki ya 1-28 Gashyantare 2025 aho Amavubi agitegereje kumenya niba azaba ari kimwe mu bihugu bibiri bitari byatangazwa na CAF nubwo tombola y’iri rushanwa iteganyijwe ku wa Gatatu tariki 15 Mutarama 2025.