Umutoza wa Manchester City, Pep Guardiola azasiba imikino ibiri ya Shampiyona nyuma y’uko abazwe umugongo i Barcelone muri Espagne.

Ikipe izaba iri gutozwa n’Umwungiriza we Juanma Lillo.

Guardiola, ufite imyaka 52, yari afite ububabare bukabije bw’umugongo maze yerekeza i Barcelona kubagwa "byihutirwa" ariko "byoroheje".

City izasura Sheffield United ku cyumweru hanyuma yakire Fulham ku ya 2 Nzeri kuri Stade Etihad.

Biteganyijwe ko Guardiola azagaruka ku kazi nyuma y’ikiruhuko cy’imikino mpuzamahanga.

Umutoza wungirije Juanma Lillo niwe uzajya akoresha imyitozo y’ikipe ya mbere kandi ayitoze mu gihe Guardiola azaba adahari.

City yavuze ko iki gikorwa cyakozwe na Dr Mireia Illueca, "cyagenze neza" kandi uyu mutoza watwaye ibikombe bitatu bikomeye umwaka ushize araba aruhukiye i Barcelona".

Iri tangazo ryongeyeho riti: "Buri wese muri Manchester City yifurije Pep gukira vuba, kandi dutegereje ko azagaruka i Manchester vuba."

Guardiola yahesheje iyi kipe Premier League, FA Cup ndetse n’igikombe cya mbere cya Champions League mu mwaka ushize.

City iri ku mwanya wa kabiri muri Premier League aho inganya amanota atandatu na Brighton ya mbere na Arsenal iri ku mwanya wa gatatu, nyuma yo gutsinda Burnley na Newcastle mu mikino ibiri ya mbere.