Minisiteri ya Siporo yatangaje ko Perezida Paul Kagame azataha ku mugaragaro Stade Amahoro ku wa Mbere, tariki ya 1 Nyakanga.

Umukuru w’Igihugu azanakurikirana umukino uzahuza APR FC na Police FC kuri uwo munsi, guhera saa Kumi n’Imwe z’umugoroba.

Amarembo y’iyi Stade iheruka gushyirwa ku rwego rwo kwakira abantu ibihumbi 45 bicaye neza, azafungurwa saa Tanu, afungwe saa Cyenda.

Kuri uwo munsi,APR FC na Police FC, bazahatanira igikombe cyiswe “Amahoro Stadium Inauguration Trophy”.

Stade Amahoro yamaze amezi asaga 19 yubakwa aho habanje gusenywa ibice bimwe na bimwe by’iyari isanzwe, hongerwaho ikindi gice ku buryo ubu bigoye kuba wamenya stade ya mbere aho yari iri n’aho iy’ubu iherereye.