Umutoza Mauricio Pochettino ashimangira ko abafana ba Chelsea badakwiriye kumusuzumira ku bikombe yatwaye mu ntangiriro z’akazi ke muri iyi kipe.

Sponsored Ad

Pochettino yamaganwe n’abafana b’iyi kipe barakajwe n’uko yabatengushye mu mwaka wa mbere batozwa n’uyu munya Argentine.

Ikipe ya Chelsea iri ku mwanya wa 10 muri Premier League, irushwa amanota 25 n’ikipe ya mbere Liverpool barahurira ku mukino wa nyuma w’igikombe cya Carabao Cup i Wembley kuri iki cyumweru.

Pochettino yizeye gutwara igikombe cya mbere cya Chelsea kuva umukire Todd Boehly yagura iyi kipe na Roman Abramovich muri Gicurasi 2022.

Afite kandi intego yo gutwara igikombe cye cya mbere mu Bwongereza, akaba yarabaye uwa kabiri muri iki gikombe muri 2015 atoza Tottenham.

Ariko Pochettino avuga ko ibikombe atari byo byonyine bigomba gusobanura umusaruro we mwiza muri iyi Chelsea, yakoresheje miliyari irenga y’amapound ($ 1.26 $) mu kugura abakinnyi bashya mu bihe bya Boehly.

Yavuze ko Jurgen Klopp yagiye azamuka buhoro buhoro muri Liverpool mbere yo gutwara ibikombe bitandatu bikomeye mu myaka icyenda amaze muri Liverpool.

Pochettino yagize ati: "Klopp yari mwiza mbere y’uko agera muri Liverpool. Yagize imyaka itatu cyangwa ine adatwara ibikombe. Ubu yatwaye Champions League na Premier League.

Ntabwo ncira urubanza umutoza cyangwa ikipe bakorana ngendeye ku bikombe. Ahubwo ni uguhatana no gutsinda, ariko hari ibintu byinshi bibigiramo uruhare.

Iyo ufite abakinnyi beza, uba uri hafi yo gutsinda.Wenda abantu bose bazavuga ko uri umutoza mwiza ku isi. Ariko buri wese azi ko atari ukuri.

Ikintu cya mbere ni ukuba mu gihe gikwiye, mu ikipe nziza ikwizera ikaguha ibikoresho n’ibituma utsinda.

Abafana bamwe bazavuga ko utari mwiza kuko utatsinze. Kuri njye, ntabwo ari inzira nziza yo gucira imanza abatoza."

Nyuma yo kwitwara nabi muri shampiyona, Chelsea yasubiye mu nzira nziza itsinda Aston Villa na Crystal Palace ibitego 3-1 yikurikiranya nyuma inganya na Manchester City igitego 1-1.