Rutahizamu w’Umunya-Nigeria, Ani Elijah yerekeje mu Ikipe ya Police FC ku masezerano y’imyaka ibiri.

Sponsored Ad

Iyi kipe y’abashinzwe umutekano ikomeje kwiyubaka kugira ngo izitware neza mu mwaka w’imikino utaha aho izanakina CAF Confederation Cup ya 2024/25 guhera muri Kanama.

Amakuru dukesha IGIHE aravuga ko ku mugoroba wo kuri uyu wa 4 Kamena, uyu mukinnyi wari usigaje umwaka umwe muri Bugesera FC,aribwo yasinyiye Police FC amasezerano y’imyaka ibiri ndetse bivugwa ko yatanzweho miliyoni 50 Frw.

Uyu musore ukinnye umwaka umwe mu Rwanda, yaguzwe Miliyoni 50, Bugesera FC iratwara Miliyoni 25 FRW ku mwaka yari asigaranye, n’umukinnyi atware Miliyoni 25 FRW.

Uyu agiye gufatanya na Peter Agblevor nawe waguzwe n’iyi kipe.

Ani Elijah ari mu bigaragaje mu mwaka w’imikino ushize aho yatsinze ibitego 15 muri Shampiyona, abinganya na Victor Mbaoma wa APR FC.

Andi makipe yamwifuje ni APR FC ndetse na Rayon Sports, ariko agenda biguru ntege mu kumugura.

Elijah umaze umwaka umwe mu Rwanda, kuri ubu ari mu bahataniye igihembo cy’umukinnyi mwiza w’umwaka wa 2023/24 aho ahanganye na Muhire Kevin wakiniraga Rayon Sports ndetse na Ruboneka Jean Bosco wa APR FC.

Rutahizamu Ani Elijah wifuzwa mu Ikipe y’Igihugu ’Amavubi’, agiye gufasha Police FC gukemura ikibazo cyo kubona ibitego mu busatirizi bwayo.