Ikipe ya Paris Saint-Germain yatsinze ikipe itamenyereye irushanwa rya Champions League ariyo Real Sociedad iyitsinda ibitego 2-0 mu mukino ubanza wa 1/16 cya UEFA Champions League wabereye kuri Parc des Princes.

Sponsored Ad

PSG idatanga icyizere muri uyu mwaka w’imikino,yorohewe na Sociedad yari hasi,muri uyu mukino ubanza.

Icyakora Sociedad yaje muri uyu mukino idafite kizigenza wayo Mikel Oyarzabal,uyitsindira cyane na Kieran Tierney,yatijwe na Arsenal.

PSG yatangiye umukino isatira byatumye Kylian Mbappé abona amahirwe akomeye ku munota wa 6,ateye mu izamu umunyezamu Alex Remiro.

Sociedad yagiye ibona amahirwe ku mashoti yageragereje kure nk’iryo ku munota wa mbere ariko umupira ujya hanze.

Ousmane Dembele yashobora gutsindira PSG igitego mu gice cya mbere ariko umupira yazamukanye wenyine yawuteye inyuma y’izamu.

Ku munota wa 44, Kapiteni wa Sociedad, Mikel Merino yateye ishoti rikomeye, umupira ukubita umutambiko w’izamu uvamo.

Igice cya Mbere cyarangiye amakipe yombi anganya ubusa ku busa.

PSG yazanye imbaraga nyinshi mu gice cya kabiri itangira gusatira bikomeye.

PSG yatsinze igitego cya mbere ku munota wa 58 ubwo Ousmane Dembélé yateraga koruneri nziza, Marquinhos akina n’umutwe umupira awuhereza Kylian Mbappé wciye mu rihumye Kubo wari umufashe atsinda igitego.

PSG yakomeje guhusha ibitego byinshi byabazwe binyuze kuri Mbappé wabonye amahirwe ntiyayakoresha.

Ku munota wa 63, uyu Mufaransa yateye ishoti rikomeye, Umunyezamu Álex Remiro arikuramo rikubita umutambiko w’izamu rijya hanze.

Ku munota wa 70,PSG yabonye igitego cya kabiri ubwo Fabian Luiz yahaga umupira Barcola, azamuka yihuta ku ruhande rw’ibumoso,acenga myugariro Traore na Zubeldia,atsinda igitego cya kabiri.

Sociedad yaruhijwe mu gice cya kabiri ariko yirwanaho ntiyatsindwa ibitego byinshi byari gutuma icyizere cyayo kiyoyoka burundu.

Icyakora iyi PSG nubwo yatsinze uyu mukino ibitego 2-0,yakinnye idafite myugariro wayo Milan Skrniar n’abandi bakinnyi.

Mu wundi mukino, Lazio de Rome yatsindiye mu rugo Bayern Munich igitego 1-0 cya Ciro Immobile kuri penaliti nyuma y’ikosa myugariro Dayot Upamecano yakoze ryatumye anahabwa ikarita y’umutuku ku munota wa 67.

Bwa mbere kuva 2019 ,Bayern München yasoje umukino idateye mu izamu.Iteye ishoti 1 rigana mu izamu mu mikino ibiri iheruka.

Thomas Tuchel atsinzwe umukino wa 10 muri 43 amaze gutoza Bayern München,uko gutsindwa kurangana nuko Julian Nagelsmann yagize mu mikino 84 yatoje iyi kipe.

Imikino yo kwishyura iteganyijwe tariki 5 Werurwe 2024. Ni mu gihe indi ibanza ya ⅛ iri mu cyumweru gitaha tariki 20 n’iya 21 Gashyantare 2024.