Imikino ya UEFA Champions League yakomeje gukinwa mu ijoro ry’itariki ya 22 Mutarama 2025, aho Paris Saint Germain yaturutse inyuma itsinda Manchester ibitego 4-2 biyongera amahirwe yo gukina imikino ya kamarampaka.

Sponsored Ad

Umukino wa PSG na Man City wari utegerejwe cyane kuko amakipe yombi yarwaniraga kwisanga mu mwanya mwiza wo kuzabona itike y’icyiciro gikurikira.

Iyi kipe yo mu Bufaransa yabyitwayemo neza, itsinda iy’i Manchester ibitego 4-2, bituma iyi kipe yo mu Bwongereza ijya mu mazi abira kuko kugeza ubu iri mu yasezerewe.

Man City iri ku mwanya wa 25 n’amanota umunani, gusa mu gihe yatsinda umukino wa nyuma ifitanye na Club Brugge yazajya mu makipe azanyura mu mikino ya kamarampaka.

Ku rundi ruhande, Real Madrid iri kugaruka mu bihe byayo bya Champions League, yanyagiye Salzburg ibitego 5-1 birimo bibiri bya Rodrygo na Vinícius Júnior, n’ikindi cya Kylian Mbappé.

Iyi ntsinzi yatumye iyo kipe ifite igikombe giheruka yiyongerera amahirwe yo kuzaboneka mu makipe umunani abona itike y’imikino yo gukuranwamo kuko ubu iri ku mwanya wa 16 n’amanota 12, irushwa rimwe na Bayer Leverkusen iri ku mwanya wa munani.

Bayern Munich yatunguwe na Feyenoord Rotterdam, itsindwa ibitego 3-0, yibuza amahirwe yo kwishyira mu mwanya mwiza mbere y’umukino wa nyuma.

Amakipe yamaze gutera intambwe iyemerera gukomeza muri ⅛, arimo Liverpool FC iyoboye urutonde kugeza ubu, igakurikirwa na FC Barcelona, Arsenal, Inter Milan, Atletico Madrid, AC Milan, Atlanta na Bayer 04 Leverkusen.

Aya ni yo makipe ayoboye mbere hakinwa umunsi wa munani wa UEFA Champions League ari nawo wa nyuma, uteganyijwe tariki ya 28 na 29 Mutarama 2025.

Uko imikino yo ku wa Gatatu yagenze

Real Madrid 5-1 Salzburg

Arsenal 3-0 Dinamo Zagreb

Paris Saint Germain 4-2 Manchester City

AC Milan 1-0 Girona

Celtic 1-0 Young Boys

Feyenoord 3-0 Bayern Munchen

Sparta Praha 0-1 Inter Milan

Shakhtar 2-0 Brest

RB Leipzig 2-1 Sporting