Benshi bakomeje kwibaza umumaro w’amafaranga abanya Qatar bashora mu ikipe ya PSG kuko ikomeje gusezererwa mu buryo bugayitse muri Champions League byitwa ko ifite abakinnyi b’ibyamamare.
Mu mukino wo kwishyura wa 1/16 cya Champions League,ikipe ya PSG yatsindiwe ku kibuga Allianz Arena na Bayern Munich ibitego 2-0 byiyongera kuri 1-0 yabatsindiye i Paris ihita ikomeza muri 1/4.
Muri uyu mukino utarimo ishyaka no kwitanga ku ruhande rwa PSG yari yitezweho gukora ibitangaza,Bayern yabyaje (…)

Benshi bakomeje kwibaza umumaro w’amafaranga abanya Qatar bashora mu ikipe ya PSG kuko ikomeje gusezererwa mu buryo bugayitse muri Champions League byitwa ko ifite abakinnyi b’ibyamamare.

Mu mukino wo kwishyura wa 1/16 cya Champions League,ikipe ya PSG yatsindiwe ku kibuga Allianz Arena na Bayern Munich ibitego 2-0 byiyongera kuri 1-0 yabatsindiye i Paris ihita ikomeza muri 1/4.

Muri uyu mukino utarimo ishyaka no kwitanga ku ruhande rwa PSG yari yitezweho gukora ibitangaza,Bayern yabyaje umusaruro impano yiherewe n’abakinnyi bo hagati ba PSG itsinda uyu mukino bitayigoye.

Mu gice cya mbere cy’umukino nibwo Bayern Munich yagowe kuko yari itsinzwe igitego cy’uburangare bw’umunyezamu Yann Sommer wacengeye mu rubuga rw’amahina,yamburwa umupira na Achraf Hakimi wahise ahereza Vitinha atera agashoti gato mu izamu ryari ryambaye ubusa,myugariro Matthijs de Ligt ahita atabara ikipe ye.

Bayern Munich yafunguye amazamu ku munota wa 61 ku gitego cyatsinzwe na Eric Maxim Choupo-Moting ku mupira mwiza yahawe na Goretzka bawambuye Verratti imbere y’urubuga rw’amahina.

Igitego cya kabiri cya Bayern Munich cyatsinzwe na Serge Gnabry winjiye asimbuye ku munota wa 89 ku mupira yahawe na Joao Cancelo.

Bayern Munich yakabaye yatsinze ibitego 4 ariko bibiri byanzwe na VAR birimo icya Choupo-Moting na Sadio Mane.

Mu gice cya kabiri nabwo PSG yabonye amahirwe ya Sergio Ramos na Mbappe ariko umunyezamu Sommer aba ibamba.

Iyi ni inshuro ya 5 muri 7 ikipe ya PSG isezerewe muri 1/16 kandi ishora umurundo w’amafaranga buri mwaka mu kugura abakinnyi no kubahemba akayabo.

PSG yagowe no gukina idafite Messi watwaye igikombe cy’isi mu mpera z’umwaka ushize kuko uwo yari ifite yari hasi cyane.

Kylian Mbappe wari witezwe,ntiyabashije kubona imipira myinshi ndetse n’uburyo yabonye ntibwari bwza ku buryo yabubyaza umusaruro.

Mu wundi mukino wabaye,Tottenham yanganyije 0-0 na AC Milan ihita isezererwa kuko iyi kipe yo mu Butaliyani yabatsinze igitego 1-0 mu mukino ubanza.

Kugeza ubu, amakipe amaze kubona itike ya ¼ ni Chelsea, Benfica, Bayern Munich na AC Milan.Byitezwe ko Real Madrid iziyungaho.