Pyramids FC yo mu Misiri yegukanye CAF Champions League itsinze Mamelodi Sundowns yo muri Afurika y’Epfo ibitego 3-2 mu mikino yombi.

Sponsored Ad

Uyu mukino wa nyuma wo kwishyura wabaye ku Cyumweru, tariki ya 1 Kamena 2025 mu Misiri.

Iyi kipe yo mu Misiri yawugiyemo ihabwa amahirwe kuko ubanza amakipe yombi yanganyije igitego 1-1, bityo itegeko ry’igitego cyo hanze ryashobora kuyirengera.

Iyi kipe yo mu Misiri yatangiye umukimo neza isatira bikomeye ariko itabasha kureba mu izamu.

Ku munota wa 23, Mohamed Sharaf Eldin yahinduye umupira imbere y’izamu, Teboho Mokoena ntiyawuhamya neza usanga Fiston Mayele atera ishoti atsinda igitego cya mbere.

Igice cya mbere cyarangiye Pyramids FC yatsinze Mamelodi Sundowns igitego 1-0.

Ikipe yo mu Misiri yakomeje gukina neza no mu gice cya kabiri, ikomeza gusatira.

Ku munota wa 56, Waldi Elkarti yateye coup franc nziza umupira usanga Ahmed Samy akina n’umutwe atsinda igitego cya kabiri.

Cyabanje gushidikanywaho ariko nyuma yo kugenzura neza hifashishijwe VAR, umusifuzi wo hagati mu kibuga Omar Artan yemeza ko ari igitego.

Mu minota 70, Mamelodi yatangiye gusatira bikomeye ishaka uko yakwishyura ibitego.

Bidatinze ku munota wa 75, Iqraam Raynes yishyuye igitego cya mbere ku burangare bw’ab’inyuma ba Pyramids.

Iyi kipe yo muri Afurika y’Epfo yakomeje gusatira cyane ariko umunyezamu Ahmed Naser Elshenawi ayibera ibamba kuko yakuragamo imipira myinshi.

Umukino warangiye Pyramids FC yatsinze Mamelodi Sundowns ibitego 3-2 mu mikino yombi, yegukana CAF Champions League ku nshuro ya mbere mu mateka.

Yabaye ikipe ya kane yo mu Misiri yegukanye iri rushanwa. By’umwihariko Pyramids FC irazwi cyane mu Rwanda kuko yasezereye APR FC mu myaka ibiri ishize.