Ku wa kabiri, tariki ya 5 Werurwe, Perezida wa RDC, Félix Tshisekedi na mugenzi we wa Qatar, Sheikh Tamim bin Hamad Al Thani bemeranyije uburyo bwo kurushaho kunoza umubano w’ibihugu byombi.

Sponsored Ad

Aba banyapolitiki bombi bafashe iki cyemezo mu biganiro bagiranye ku ngoro ya “Amiri Diwan” i Doha.

Kuri iyi nshuro,Félix Tshisekedi na Tamin Ben Hamad banasuzumye imbanzirizamasezerano yashyizweho umukono muri Werurwe 2021, hagati ya DRC na Qatar.

Aya masezerano yibanze ku kuvugurura no guteza imbere ibikorwa remezo birimo ikibuga cy’indege n’ibyambu, kongerera ubushobozi inzego zitandukanye ndetse n’ubufatanye mu by’indege n’amato.

I Doha, ibiganiro hagati y’abo bakuru b’ibihugu byombi byakurikiwe n’abayobozi bari kumwe.

Mu gusoza urugendo rwe muri Qatar, umukuru w’igihugu cya Kongo yitabiriye, kuri uyu wa kabiri,ibirori bya Congo Day, byizihijriwe muri Expo Doha 2023.

Félix Tshisekedi yakoze urugendo rwe rwa kabiri i Doha, nyuma y’urwo muri Werurwe 2021.

Ku rundi ruhande,Guverinoma y’u Burusiya yemeje amasezerano y’ubufatanye mu bya gisirikare na Repubulika Iharanira Demokarasi ya Congo.

Muri ayo masezerano hagaragazwa ko ibihugu byombi bizafatanya mu myitozo y’inzego z’umutekano, gutozwa imikoreshereze y’ubwato cyangwa indege z’intambara mu gihe byasabwe kandi byumvikanweho n’ibindi nkuko Ibiro Ntaramakuru TASS byabitangaje.