Umunya-Espagne Rafael Nadal yatangaje ko atazakina Irushanwa rya Tennis ribera muri Leta Zunze Ubumwe za Amerika “US Open” bitewe nuko atari kwitwara neza muri ikigihe.

Sponsored Ad

Abinyujije kuri X yahoze ari Twitter Nadal yavuzeko US Open izatangira tariki ya 19 Kanama igasozwa ku wa 8 Nzeri ari ahantu heza afite ibihe byiza ahora azirikana .
Yongeyeho ati “Nzakumbura amajoro adasanzwe n’imyitozo yo muri New York.”
Nadal watsinzwe na Novak Djokovic mu Mikino Olempike, akagera muri ¼ cy’iyo Mikino ari kumwe na Carlos Alcaraz mu bakina ari babiri, yakinnye US Open inshuro imwe kuva mu 2019.

Uyu Munya-Espagne w’imyaka 38 ntiyigeze yemeza niba hari imvune afite, ariko yavuze ko yafashe icyemezo cyo kutazarushanwa i New York.
Rafael Nadal yatwaye ibikombe 22 by’amarushanwa ane akomeye muri Tennis [Grand Slam] birimo bine bya US Open.
Yavuze ko ateganya kuzongera gukina muri Laver Cup izabera i Berlin muri Nzeri.
Nubwo yari yigeze kuvuga ko ashobora gusezera gukina muri uyu mwaka, mbere yo gukina French Open, Nadal yavuze ko atazi neza “100%” niba ari ubwa nyuma azaba akinnye muri Roland Garros.
Yikuye muri Australian Open muri Mutarama kubera imvune ndetse ntiyakina Wimbledon yabereye mu Bwongereza kugira ngo abashe kwitegura neza Imikino Olempike.