Rutahizamu Marcus Rashford yakuwe mu ikipe ya Manchester United igomba guhura na Fulham kuri uyu wa Gatandatu.

Uyu rutahizamu wa Red Devils yanenzwe ku mugaragaro n’umutoza Erik Ten Hag kuba yaragiye mu birori mu cyumweru gishize nyuma y’umukino batsinzwe ibitego 3-0 na Manchester City.

Uyu mukino ukimara kurangira,Rashford yagiye ahitwa glitzy nightspot Chinawhite kwizihiza isabukuru ye y’imyaka 26.

Ariko Ten Hag yemeje ko yavuganye n’uyu rutahizamu nyuma y’ibyabaye barabirangiza.

Uyu muholandi yagize ati: "Yego, ndabizi. Naganiriye nawe kuri byo.

Ntabwo byemewe. Narabimubwiye, asaba imbabazi kandi nibyo. Kuri twe, ni ikibazo cy’imbere mu ikipe. ”

Rashford yinjiye mu kibuga asimbuye mu mukino wo kuwa Gatatu United yatsindiwe ku kibuga cyayo na Newcastle ibitego 3-0 isezererwa mu gikombe cya Carabao.

Mu bakinnyi bagombaga gukina umukino wa United na Fulham kuri Craven Cottage, Rashford ntabwo yaje mu ikipe aho bivugwa ko yagize imvune mu gitondo.

Uyu musore w’Umwongereza yavuye i Manchester yerekeza mu burengerazuba bwa London gukina uyu mukino wa Premier League,ariko umutoza Ten Hag yamukuye mu bo kwifashishwa kubera ko ngo atameze neza.

Ten Hag yemeje ko impamvu yatumye Rashford akurwa mu ikipe ari uko yagiriye ikibazo mu myitozo yo kuwa Gatanu ndetse muri iki gitondo ngo ntiyigeze akira neza.

Yagize ati: "Yajyanye natwe ariko ntiyabonetse mu ikipe.

"Twamugerageje muri iki gitondo ariko ntabwo yari mwiza bihagije.

"Ntabwo ameze neza."

Abajijwe niba yari kubanza mu kibuga iyo aramuka ameze neza, Ten Hag yagize ati: "Yego.

"Ariko tugomba kurangiza icyo kibazo. Nabivuze byose."

United yahisemo gukoresha imbere Rasmus Hojlund,Antony na Alejandro Garnacho kuri uyu mukino wa Fulham.

Varane na Mason Mount babanje hanze mu gihe Wan Bissaka yagarutse.

Abakinnyi Erik Ten Hag yabanje mu kibuga:

Onana; Wan-Bissaka, Maguire, Evans, Dalot; McTominay, Eriksen, Fernandes; Garnacho, Antony; Hojlund.