Ikipe ya Rayon Sports yageze mu mujyi wa Benghazi muri Libya aho igiye gukina na Al Hilal Benghazi mu mukino ubanza w’ijonjora rya nyuma ryo kwerekeza mu matsinda ya CAF Confederation Cup.

Abakinnyi bakigera muri Libya bahise bajya gufata amafunguro yo ku manywa no kuruhuka mbere yo gukora imyitozo ya mbere Saa 18h00.

Ku mugoroba wo ku wa 12 Nzeri 2023 ni bwo Al Hilal Benghazi yandikiye CAF iyisaba ko umukino wayo na Rayon Sports wakwimurwa. Yatanze impamvu y’Inkubi y’umuyaga yiswe ’Daniel’ ndetse n’imyuzure yibasiye Libya imaze guhitana abagera ku 5000.

Ikipe ya Rayon Sports iracyategereje abakinnyi 2 b’Abarundi Aruna Madjaliwa na Mvuyekure Emmanuel bari mu ikipe y’igihugu yatsinzwe na Cameroon ibitego 3-0 bakazagera muri Libya kuri uyu wa Kane.

Iyi baruwa y’ubusabe yakurikiwe n’amakuru yakwirakwijwe ko uyu mukino utazakinwa ndetse ko CAF yemereye amakipe yo muri Libya ari mu Marushanwa Nyafurika kwimura imikino yayo.

Al Hilal Benghazi izakira Rayon Sports ku wa Gatanu, tariki 15 Kanama 2023, saa 20:00 kuri Benina Martyrs Stadium mu mukino ubanza w’Ijonjora rya Kabiri muri CAF Confederation Cup. Umukino wo kwishyura uteganyijwe i Kigali, tariki 30 Nzeri 2023.

Mu gitondo cyo kuri uyu wa 13 Nzeri 2023, ni bwo CAF yasohoye ibaruwa itumiza amakipe yombi mu nama iteganyijwe tariki 14 Nzeri 2023 saa Tanu muri Berenice Tourist Hotel aho izitabirwa n’abashinzwe ubuzima bwa buri munsi bw’ikipe (Team Managers), abashinzwe ibikoresho, abaganga ndetse n’abashinzwe gutegura umukino.

Ni inama isanzwe itegurwa mbere ya buri mukino, izareberwamo imyambaro amakipe yombi azakoresha haba ku bakinnyi n’abanyezamu, ndetse n’iyo abazicara ku ntebe y’abasimbura bazaba bambaye mu rwego rwo kwirinda kuba amakipe yahurira ku mwambaro umwe cyangwa ijya gusa.

Rayon Sports ishaka kugera mu matsinda ku nshuro ya kabiri igera muri iki cyiciro iherukamo mu 2018 aho yageze mu mikino ya ¼ igasezererwa na Enyimba yo muri Nigeria.

Ishyirahamwe ry’umupira w’amaguru muri Libya ryatangaje ko hamaze kumenyekana abakinnyi 4 bazize inkubi y’umuyaga ta "Danie" yibasiye iki gihugu.

Nyum y’iminsi abiri abuze, Shahin Al-Jamil wakiniraga Al-Tahadi basanze yaratembanywe n’umwuzure yapfuye.