Ishyirahamwe ry’Umupira w’Amaguru mu Rwanda, FERWAFA, ryimuye umukino wa Rayon Sports na Intare FC habura amasaha abiri n’igice ngo ukinwe.
Rayon Sports yagombaga kwakirira Intare FC kuri Stade ya Bugesera saa Sita n’Igice zo kuri uyu wa Gatatu, tariki ya 8 Werurwe 2023.
Uyu mukino ku ikubitiro wagombaga kubera i Muhanga, ariko Akarere kamenyesha Rayon Sports ko stade yako itazaboneka kuko izakira ibirori byo kwizihiza Umunsi Mpuzamahanga w’Abagore.
Rayon Sports yaje gusaba FERWAFA (…)

Ishyirahamwe ry’Umupira w’Amaguru mu Rwanda, FERWAFA, ryimuye umukino wa Rayon Sports na Intare FC habura amasaha abiri n’igice ngo ukinwe.

Rayon Sports yagombaga kwakirira Intare FC kuri Stade ya Bugesera saa Sita n’Igice zo kuri uyu wa Gatatu, tariki ya 8 Werurwe 2023.

Uyu mukino ku ikubitiro wagombaga kubera i Muhanga, ariko Akarere kamenyesha Rayon Sports ko stade yako itazaboneka kuko izakira ibirori byo kwizihiza Umunsi Mpuzamahanga w’Abagore.

Rayon Sports yaje gusaba FERWAFA kwakirira mu Bugesera, ndetse irabyemererwa.

Uyu munsi byari biteganyijwe ko Rayon Sports ikina na Intare FC mu gihe APR FC na yo icakirana na Ivoir Olympic.

Bitewe n’uko imikino ibiri yahuriye ku kibuga kimwe, hanzuwe ko amakipe ya mbere akina saa Sita n’Igice, andi akinjira mu kibuga saa Cyenda n’Igice.

Mu gihe haburaga amasaha abiri n’igice ngo umukino wa mbere utangire, FERWAFA yamenyesheje Rayon Sports na Intare FC ko umukino wayo wo kwishyura muri 1/8 cy’Igikombe cy’Amahoro wasubitswe.

Itangazo yashyize hanze rivuga ko icyemezo cyashingiwe "ku mategeko agenga iryo rushanwa aho ateganya ko ku mukino wo kwishyura hitabazwa iminota y’inyongera mu gihe amakipe yombi anganyije umubare w’ibitego."

FERWAFA yavuze ko Stade ya Bugesera idafite amatara ashobora kwitabazwa mu gihe hakenerwa iminota y’inyongera ku mikino yombi.

Iti "Turabamenyesha ko umukino wagombaga kubahuza wimuriwe tariki ya 10 Werurwe 2023.’"

Rayon Sports yasabwe kumenyesha FERWAFA ikibuga izakoresha bitarenze kuri uyu wa Gatatu, saa Sita.

Iyi baruwa ikimara kugera hanze, Rayon Sports yagaragaje ko itacyishimiye bitewe n’uko yabimenyeshejwe itinze.

Umuvugizi wa Rayon Sports, Nkurunziza Jean Paul, yabwiye IGIHE dukesha iyi nkuru ko bagiye kwicara bakiga kuri iki cyemezo.

Yagize ati "Ntabwo batumenyesha ko bahagaritse umukino ku munsi wawo kandi twamaze kuwitegura. Tugiye kwicara turebe impamvu bawusubitse."

Mu mukino ubanza, Rayon Sports yatsinze Intare FC ibitego 2-1 i Shyorongi tariki 28 Gashyantare mu gihe APR FC yo yanganyije na Ivoir Olympic 0-0 ku Mumena tariki 1 Werurwe 2023.

IVOMO:IGIHE