Tombola y’amatsinda y’amajonjora mu karere ka CECAFA yo gushaka ikipe izahagararira aka karere muri CAF Women’s Champions League 2026. Ikipe ya Rayon Sports WFC yamenye amakipe izahura nayo.

Ni Tombola yabereye kuri Stade Amahoro i Kigali kuri uyu wa Kane tariki 30 Nyakanga 2026. Aya majonjora yitabiriwe n’amakipe 10 yo mu bihugu bigize CECAFA. Iyi mikino izabera mu Rwanda kuva ku wa 21 kugeza ku wa 31 Kanama 2026. Imikino yose izakinirwa kuri Kigali Pelé Stadium no ku Kibuga cya FERWAFA.

Mu makipe azitabira harimo Rayon Sports WFC ihagarariye u Rwanda, Simba Queens yo muri Tanzania na Commercial Bank of Ethiopia FC (CBE) yo muri Ethiopia, amakipe amaze no kwegukana igikombe cya CECAFA mu bihe bitandukanye.

Uko amatsinda azaba ateye

Itsinda A

Rayon Sports WFC (Rwanda), Yei Joint Stars (Sudani y’Epfo), Mafunzo WFC (Zanzibar) na Denden FC (Eritrea)

Itsinda B

Commercial Bank of Ethiopia FC (Ethiopia), Kawempe Muslim Ladies (Uganda) na FC Ujeco (Djibouti)

Itsinda C

Simba Queens (Tanzania), Kenya Police Bullets (Kenya) ndetse na Top Girls Academy (Burundi)

Rayon Sports WFC izatangira urugendo rwayo ihangana n’amakipe atatu akomeye mu Itsinda A, mu gihe Itsinda C rifatwa na benshi nk’irizaba ririmo guhangana gukomeye bitewe n’uko ririmo amakipe akomeye nka Simba Queens na Kenya Police Bullets.

Ikipe izitwara neza ikegukana iri rushanwa ni yo izabona itike imwe rukumbi yo guhagararira akarere ka CECAFA muri CAF Women’s Champions League 2026. Impuzamashyirahamwe y’Umupira w’Amaguru muri Afurika (CAF) iracyategerejweho gutangaza igihugu kizakira icyiciro cya nyuma cy’iri rushanwa ndetse n’amatariki kizakinirwaho.