Ikipe ya Rayon Sports yashyize hanze itangazo rigaragaza amasezerano y’imyaka itanu yagiranye n’ikipe y’ikigugu ya Raja Club Athletics Casablanca yo muri Maroc isanzwe ari ubukombe ku mugabane w’Afurika.

Sponsored Ad

Aya masezerano azatuma aya makipe akunze kurusha ayandi yose yo mu bihugu byayo asangira ubunararibonye,atizanya abakinnyi,ubumenyi ndetse n’ibikoresho bitandukanye,gufashanya kuzamura abakinnyi bato,kugurishanya abakinnyi,gukinana imikino ya gicuti hagati yayo ndetse no gufatanya gukoresha ikoranabuhanga.

Nyuma y’aya masezerano,perezida wa Rayon Sports,Uwayezu Jean Fidele yagize ati “Twishimiye kugira amasezerano y’imikoranire n’iyi kipe y’ikinyejana,Raja Athletic Club,turifuza kugirana imishyikirana myiza.

Twizeye ko ubu bufatanye buzafasha abakinnyi kuzamuka yaba abato cyangwa abakuru,abatoza n’abafana.”

Perezida wa Raja Athletic club,Bwana Rachid Benbrahim El Andaloussi yagize ati “Raja Casablanca yishimiye kugirana ubufatanye na Rayon Sports kuko buzatuma abantu n’ibihugu byegerana,ubu twabigezeho.

Icyifuzo cyacu n’ugukomeza mu nzira nziza yaharuwe na ba nyiricyubahiro abayobozi bacu.”

Umuyobozi wa Rayon Sports Uwayezu Jean Fidèle ari mu ruzinduko rw’iminsi itandatu mu gihugu cya Maroc mu mujyi wa Casablanca aho yasinye aya masezerano uyu munsi.

Raja Casablanca ikunzwe na benshi muri Maroc ni yo ibitse igikombe gihuza amakipe yatwaye ibikombe iwayo ’CAF Confederation Cup’ cya 2020/21.