Ku munsi w’ejo,Taliki ya 26 Nzeri 2018, nibwo ikipe ya Rayon Sports yatangiye imyitozo yo kwitegura imikino y’Agaciro nyuma yo kunyagirirwa muri Nigeria na Enyimba FC ibitego 5-1,imyitozo yagaragayemo rutahizamu mushya Michel Sarpong bakunda kwita ‘Balotelli’ ukomoka muri Ghana uherutse kugera I Kigali aje gukinira iyi kipe.

Sponsored Ad

Abakinnyi bose ba Rayon Sports bari bahari uretse Manishimwe Djabel utageze mu Nzove. Bimenyimana Bon Fils Caleb ufite ikibazo ku kaboko na Eric Irambona wavunitse ikirenge nibo bonyine batakoze imyitozo yo kuri uyu wa Gatatu yatangiye ku isaha ya saa kumi z’umugoroba.

Michel Sarpong bakunda kwita ‘Balotelli’ ukomoka muri Ghana yakoze imyitozo ya mbere imbere y’abafana ba Rayon Sports,baramwishimira kubera umuvuduko afite gusa afite byinshi byo kubereka mu mikino y’Agaciro.

Nyuma yo kunanura imitsi, abakinnyi ba Rayon Sports bagabanyijwemo amakipe 2 bakina ikibuga cyose, Michel Sarpong yisanga mu ikipe yafatwa nk’iya 2 itarimo amazina akomeye byatumye kubona imipira myinshi bimugora kuko ikipe ya mbere yabarushaga cyane.Umupira umwe Sarpong yabonye arebana n’umunyezamu yawuteye ku mutambiko w’izamu.

Abafana ba Rayon Sports bahaye amashyi uyu rutahizamu sarpong mu myitozo ya nyuma umutoza Robertinho akunda guha abakinnyi baje mu igerageza.

Rayon Sports iri kwitegura guhura na AS Kigali kuri uyu wa 5 mu irushanwa ry’Agaciro.rizatangira tariki 28 Nzeri,kuri Stade Amahoro I Remera.

Amafoto:Rwanda Magazine