Kuri uyu wa kabiri nibwo habaye tombola y’uko amakipe azacakirana mu mikino ya CECAFA Kagame Cup yari imaze imyaka myinshi idakinwa,aho Rayon Sports izahagararira u Rwanda iri mu itsinda rimwe na Gor Mahia, Lydia Ludic Academic na Port yo muri Djibouti.

Iri rushanwa ryari rimaze imyaka 3 ritaba,rigiye kubera muri Tanzania guhera tariki ya 28 Kamena kugeza tariki ya 12 Nyakanga aho amakipe y’ibigugu yo muri aka karere k’Iburasirazuba azacakirana.

Uko imikino ya CECAFA ipanze

Rayon Sports yisanze mu itsinda rya 2 ririmo amakipe nka LLB yatwaye igikombe cya shampiyona mu Burundi mu mwaka ushize, bahuye mu mikino y’amajonjora ya CAF Champions League,iri kumwe kandi na Gor Mahia yo muri Kenya, bahuriye mu itsinda D mu mikino ya CAF Confederation Cup na Port yo muri Djibouti.

Rayon Sports ishobora kutitabira iri rushanwa kuko izaba ikiri mu mikino ya shampiyona ndetse n’igikombe cy’Amahoro iramutse igeze muri ½.

AZAM niyo yatwaye CECAFA iheruka

Icyashimishije abantu ni uko amakipe 2 akomeye yo mu gihugu cya Tanzania ahora ahanganye cyane Simba SC na Yanga Africans yahuriye mu itsinda rya 3.

Rayon Sports nibasha kwitabira iyi mikino,izakina umukino wayo wa mbere ku wa 01 Nyakanga 2018 na Gor Mahia I Dar Es Salaam.

Amatsinda ya CECAFA Kagame Cup:
Itsinda rya mbere:
AZAM FC (Tanzania)
KCCA (Uganda)
JKU (Zanzibar)
Kator FC (South Sudan)

Itsinda rya 2:
Rayon Sports FC (Rwanda)
Gor Mahia (Kenya)
Lydia Lydic (Burundi)
Ports (Djibouti)

Itsinda rya 3:
Yanga Africans (Tanzania)
Simba SC (Tanzania
St George (Ethiopia)
Dakadaha (Somalia)