Ikipe ya Rayon Sports yongeye kwereka Bugesera FC ko ari ubukombe mu mupira w’amaguru mu Rwanda,kuko iyinyagiye ibitego 3-0 mu mukino w’umunsi wa 5 wa shampiyona y’u Rwanda AZAM Rwanda Premier Legue wabereye kuri stade ya Kigali.

Rayon Sports ikomeje gutera intambwe nziza nyuma yo gutsindwa na Mukura VS kuko itsinze ibitego 3-0 mu mikino 2 yikurikiranya yakinnye na Gicumbi FC na Bugesera FC bakinnye uyu munsi.

Rayon Sports yaherukaga gutsindira kuri stade ya Kigali,Bugesera FC ibitego 5-0 mu ri shampiyona ishize,yongeye kuyisubira iyinyabika ibitego 3-0 kuri uyu wa Kane Taliki ya 08 Ugushyingo 2018.

Ibitego bya Rayon Sports byatsinzwe na Bimenyimana Bonfils Caleb kuri penaliti yakoreweho na Gasongo, ku munota wa 28,Niyonzima Olivier Seif yatsinze icya kabiri ku munota wa 43 na Caleb watsinze igitego cya 3 ku munota wa 79 w’umukino.

Caleb yakabaye yatsinze ibitego 3 wenyine muri uyu mukino,kuko ku munota wa 46 w’umukino yahawe penaliti ya kabiri,ayikubita umutambiko w’izamu irasohoka.

Benshi mu bafana ba Rayon Sports banenze Caleb kuko yanze gusaranganya penaliti na rutahizamu Sarpong Micheal,wamusabye iyi penaliti ya kabiri akayimwima,yarangiza akayihusha.

Rayon Sports igize amanota 12 ku mwanya wa 3 wa shampiyona nyuma ya APR FC ya mbere n’amanota 15 kuri 15 na Mukura VS ya kabiri n’amanota 13.

Uko imikino yakinwe kuri uyu wa Kane yagenze:
Espoir FC 1-0 Kirehe FC
Rayon Sports FC 3-0 Bugesera FC
AS Muhanga 0-0 Marines FC
Police FC 1-0 Musanze FC