Ikipe ya Rayon Sports yongeye kubona amanota 3 nyuma yo gutsinda ibitego 2-1 ikipe Etoile de l’Est,mu mukino w’Umunsi wa Gatandatu wa Shampiyona.

Uyu mukino Rayon Sports yari yakiriye Etoile de l’Est kuri Kigali Pele Stadium,guhera saa Kumi n’ebyiri.

Rayon Sports yakiriye uyu mukino nyuma yo gutandukana n’Umutoza Yamen Zelfani wayihesheje amanota atandatu mu mikino ine mu gihe Etoile de l’Est na yo yatsinze imikino ibiri iheruka ikagira amanota atandatu.

Abakinnyi 11 Rayon Sports yabanje mu kibuga ntibarimo Yousef Rhab na Hategekimana Bonheur,bose bari ku ntebe y’abasimbura.

Wade wari umutoza wungirije niwe watoje, aha umwanya Simon Tamale na Iraguha Hadji bari baraciwe kwa Zelfani.

Umunyezamu Simon Tamale yahawe amahirwe yo gukina umukino we wa mbere muri shampiyona nyuma y’uko yari yaratakarijwe icyizere na Zelfani.

Rayon Sports yafunguye amazamu ku munota wa 32 ku gitego cyatsinzwe na Musa Esenu ku mupira wari uvuye kuri koloneri ya Iraguha Hadji.

Rayon Sports yari ifite inyota yo kubona amanota 3 iheruka ku munsi wa mbere wa shampiyona itsinda Gasogi United,yakomeje kotsa igitutu Etoile ishaka ibitego byinshi.

Ku munota wa 43,Rayon Sports yabonye igitego cya kabiri cyaturutse ku mupira Ojera yinjiranye mu rubuga rw’amahina acenga abakinnyi babiri, awuhinduye usanga Musa Esenu atsinda igitego.

Igice cya mbere cyarangiye ari ibitego 2-0 bya Rayon Sports ndetse yabonye amahirwe menshi kurusha Etoile de l’Est.

Musa Esenu wari umaze igihe ahabwa umwanya ntabone ibitego,yatsinze ibitego byombi byabonetse mu gice cya mbere.

Rayon Sports yashyize igitutu kuri Etoile de l’Est binyuze ku barimo Ojera na Iraguha Hadji kandi byatanze umusaruro.

Etoile de l’Est yatangiye igice cya kabiri isatira ariko ntiyabyaza umusaruro amahirwe yabonye.

Ku munota wa 61,Mvuyekure Emmanuel yahawe ikarita itukura,nyuma yo gutakaza umupira yari ahanganiye n’umukinnyi wa Etoile de l’Est, awufata mu ntoki, ahabwa ikarita y’umuhondo.

Mu kutabyishimira, umupira yawukubise umusifuzi Ishimwe Claude wahise umuha ikarita itukura ako kanya.

Etoile de l’Est yakomeje guhiga igitego cya mbere ariko yatinze kukibona ari nabyo byayiviriyemo gutakaza umukino.

Ku munota wa 90 nibwo Godspower Gabriel yatsindiye Etoile de l’Est igitego, ku mupira yatereye mu ruhande, umunyezamu Tamale ntiyabasha kuwukuramo.

Ku munota wa 93, Etoile de l’Est yabonye uburyo bwiza ubwo Irambona Fabrice yahabwaga umupira mwiza, awutera hejuru y’izamu.

Rayon Sports yabonye intsinzi ya mbere kuva 18/08/2023 itsinda Gasogi United

Mvuyekure Emmanuel wabonye ikarita y’umutuku akurikiye Charles Bbaale, Heritier Luvumbu na Mujyanama bazibonye kuri Marines banganyije 2-2.

Mu yindi mikino y’Umunsi wa Gatandatu wa Shampiyona yabanje ku gicamunsi; Police FC yatsinze Muhazi United ibitego 2-1, Marines FC itsindwa na AS Kigali igitego 1-0 naho Amagaju FC anganya na Kiyovu Sports igitego 1-1.

Mu mukino ukurikiyeho,Rayon Sports izasura Musanze FC mu gihe APR FCizakina na Mukura VS.

Urutonde:

1. Musanze FC 13 Pts
2. APR FC 11 Pts (-1)
3. Amagaju 10 Pts
4. Rayon Sports 9 Pts (-1)
5. KIYOVU Sports 9 Pts
6. MUKURA VS 9 Pts