Ikipe ya FC Barcelona na Atletico Madrid zaraye zisezerewe mu matsinda ya UEFA Champions League zerekeza muri Europa League nyuma yo kunanirwa gutsinda imikino zakinnye.
Amahirwe ya Barcelona yo kugera muri 1/16 cy’irangiza yakomwe mu nkokora nyuma yo gutsindirwa mu rugo ibitego 3-0 na Bayern Munich iyoboye itsinda C.
FC Barcelona yasabwaga gutsinda imikino 2 yari isigaranye ndetse Inter Milan igatsindwa yose,yahuye n’akaga gakomeye inyagirwa na Bayern ibitego 3-0 byatsinzwe na Sadio Mane, (...)

Sponsored Ad

Ikipe ya FC Barcelona na Atletico Madrid zaraye zisezerewe mu matsinda ya UEFA Champions League zerekeza muri Europa League nyuma yo kunanirwa gutsinda imikino zakinnye.

Amahirwe ya Barcelona yo kugera muri 1/16 cy’irangiza yakomwe mu nkokora nyuma yo gutsindirwa mu rugo ibitego 3-0 na Bayern Munich iyoboye itsinda C.

FC Barcelona yasabwaga gutsinda imikino 2 yari isigaranye ndetse Inter Milan igatsindwa yose,yahuye n’akaga gakomeye inyagirwa na Bayern ibitego 3-0 byatsinzwe na Sadio Mane, Eric Maxim Choupo-Moting na Benjamin Pavard,ihita isezererwa.

Icyakora n’iyo inatsinda ntacyo byari kuyimarira kuko mu mukino wari wabanje,Inter Milan yari yatsinze Victoria Plzen ibitego 4-0.

Ibitego bya Edin Dzeko watsinze 2, Henrikh Mkhitaryan na Romelu Lukaku nibyo byafashije Inter Milan gusanga Bayern Munich muri 1/16.

Ikipe ya Xavi yashoye amafaranga menshi mu kugura abakinnyi bakomeye mu mpeshyi aho yazanye Lewandowski,Kounde,Rafinha,Kessie,Christensen,Marcos Alonso na Bellerin ariko ntacyo bayimariye.

Iyi ni inshuro ya kabiri yikurikiranya iyi kipe inaniwe kurenga amatsinda ya Champions League kuko n’ubushize niko byagenze.

FC Barcelona itozwa na Xavi nta mbaraga zidasanzwe yagaragaje muri iri rushanwa kuko uretse gutsinda Plzen nta yindi kipe yatsinze yaba Bayern na Inter.Ubu ifite amanota 4 ku mwanya wa 3 mu itsinda.

Ku rundi ruhande,mugenzi wayo Atletico Madrid nayo yamanutse muri Europa League nyuma yo kunanirwa gutsinda Bayer Leverkusen mu rugo bakanganya ibitego 2-2.

Atletico Madrid yavuye muri Champions League mu buryo bubabaje nyuma yo guhusha penaliti mu minota y’inyongera.

Iyi kipe ya La Liga yamanutse muri Europa League - yatwaye muri 2018 - nyuma yo kunanirwa gutsinda Bayer Leverkusen kandi aribyo yasabwaga.

Ubwo umukino wari ugeze ku munota wa 5 w’inyongera nyuma ya 90,Atletico Madrid yahawe penaliti itavugwaho rumwe hanyuma Yannick Carrasco ayiteye ikurwamo n’umunyezamu Lukas Hradecky,bagenzi be bagerageza gusubizamo biranga.

Ikipe ya Diego Simeone yakinnye yishyura ibitego bibiri yatsinzwe na Leverkusen yatsindiwe na Moussa Diaby na Callum Hudson-Odoi.

Carrasco n’uwasimbura Rodrigo de Paul batsindiye Madrid muri uyu mukino, ariko amaherezo kunganya ntibyari bihagije kugirango barenge amatsinda.

Muri iri tsinda B,Club Brugge ni iya mbere n’amanota 10,FC Porto n’iya 2 n’amanota 9 mu gihe Atletico yasezerewe ifite amanota 5.

Ibi bivuze ko Espagne ihagarariwe n’ikipe imwe gusa muri 1/16 ariyo Real Madrid.Ibi byaherukaga kuba mu mwaka w’imikino 1998/1999 ubwo nabwo Real Madrid ariyo yarengaga amatsinda.

Itsinda rikomeye cyane muri iri rushanwa ni irya D aho amakipe yose afite amahirwe yo gukomeza ku munsi wa nyuma.

Tottenham yaraye inganyije igitego 1-1 na Sporting mu gihe Marseille yatsinzwe na Frankfurt ibitego 2-1.

Aho iri tsinda ribera akaga nuko Tottenham ariyo ya mbere n’amanota 8,Sporting na Frankfurt zinganya amanota 7 mu gihe Marseille ifite 6.Umunsi wa nyuma niwo uzatanga igisubizo kuko Tottenham izasura Marseille mu gihe Frankfurt izasura Sporting.Amakipe yose asabwa gutsinda ngo akomeze.

Mu makipe 16 ashaka itike,ane gusa niyo asigaye kuko 12 yarenze amatsinda yamaze kumenyekana arimo :

Bayern (GER)
Benfica (POR)
Chelsea (ENG)
Club Brugge (BEL)
Dortmund (GER)
Inter (ITA)
Liverpool (ENG)
Manchester City (ENG)
Napoli (ITA)
Paris Saint-Germain (FRA)
FC Porto (POR)
Real Madrid (ESP)