Ikipe ya Manchester City na Real Madrid zakomeje muri 1/4 y’irangiza cya UEFA Champions League nyuma yo gusezerera amakipe bari mukino wo kwishyura wa 1/8.

Sponsored Ad

Ku kibuga Santiago Bernabéu, Real Madrid ntiyorohewe imbere y’abafana bayo kuko yahushijwe ibitego byinshi byashoboraga kuyisezerera.

RB Leipzig yabuze amahirwe menshi yashoboraga kuyiha intsinzi binyuze ku bakinnyi bayo bakiri bato ariko bakomeye nka Dani Olomo, Xavi Simon ndetse na Lois Openda.

Real Madrid yatabawe kenshi n’umunyezamu wayo Lunin, yafunguye amazamu ku munota wa 65 ku gitego cyatsinzwe na Vinícius Júnior nyuma yo guhabwa umupira mwiza na Jude Bellingham.

Nyuma y’iminota itatu gusa, Willi Orban yahise yishyurira RB Leipzig ku mupira yahawe na David Raum.

RB Leipzig yagerageje gushaka igitego cya kabiri ngo nibura bajye mu nyongera irakibura,umukino urangira amakipe yombi anganyije igitego 1-1.

Kubera ukuntu uyu mukino wagoye Madrid,umutoza Ancelotti yavuze ko yakoze ikosa mu bakinnyi yabanje mu kibuga ndetse ko uwari kumuha amahirwe yari gukoresha ikipe itandukanye niyo yabanje.

Real Madrid yahise ikomeza muri 1/4 ku giteranyo cy’ibitego 2-1 kubera ko mu mukino ubanza wabereye mu Budage, yari yatsinze igitego 1-0 cya Brahim Diaz.

Undi mukino wabereye ku kibuga cya Etihad aho Manchester City yari yakiriye Copenhagen yo muri Denmark.

Bitayigoye na gato, Manchester City yatsinze FC Copenhagen ibitego 3-1 byose byinjiye mu gice cya mbere.

Ni ibitego byatsinzwe na Emmanuel Akanji ku munota wa gatanu,ahawe umupira na Julián Álvarez maze nyuma y’iminota ine, uyu Munya-Argentine atsinda icya kabiri.

Ku wa 29, Elyounoussi wa Copenhagen na we yatsinze igitego ku mupira yahawe na Orri Oskarsson, ariko ubwo igice cya mbere cyari kigiye kurangira, Erling Haaland atsinda igitego cya gatatu cya Manchester City ku mupira yahawe na Rodri.

Muri rusange, iyi kipe yo mu Bwongereza yasezereye FC Copenhagen iyitsinze igiteranyo cy’ibitego 6-2.

Amakipe amaze kugera muri 1/4 yose afite amazina akomeye arimo: PSG,Real Madrid,Man City na Bayern Munich.

Mu cyumweru gitaha benshi bahanze amaso Arsenal na FC Porto,FC Barcelona na Napoli,Atletico Madrid na Inter Milan na Borussia Dortmund vs PSV.