Ikipe ya Real Madrid yegukanye Super Cup ya Espagne inyagiye mukeba FC Barcelona ibitego 4-1 mu mukino wabereye muri Saudi Arabia.

Sponsored Ad

Real Madrid ikomeje kwereka Barca ko batari ku rwego rumwe kuko mu mikino bari guhura muri uyu mwaka w’imikino iri kuyitsinda iyirusha.

Hakiri kare ku munota wa 7,Vinicius Jr uzonga FC Barcelona iyo bahuye, yatsinze igitego cya mbere ku mupira mwiza yahawe na Bellingham.

Bidatinze kuwa 10 atsinda icya kabiri ku mupira yahawe na Rodrygo.

Robert Lewandowski yabonye impozamarira ku munota wa 33,ku ishoti rikomeye yateye umupira udahagaze ubwo wari uvuye mu rubuga rw’amahina rwa Madrid.

Ku munota wa 39,Ronald Araujo yakuruye Vinicius mu rubuga rw’amahina, umusifuzi atanga penaliti.Uyu munya Brazil yayinjije neza.

Ibitego bitatu bya Vinícius Junior byafashije Real Madrid gusoza igice cya mbere yatsinze Barcelona ibitego 3-1 muri uyu mukino wa nyuma wa Super Cup ya Espagne.

Real Madrid yagarutse mu gice cya kabiri ikiri hejuru ndetse itsinda Barcelona igitego cya Kane ku munota wa 64 gitsinzwe na Rodrygo.

Mu gihe Barcelona yashakaga kugabanya umwenda,myugariro wayo Ronald Araújo yahawe ikarita ya kabiri y’umuhondo ku munota wa 71,iba itukura.

Umukino waje kurangira Real Madrid itsinze ibitego 4-1 yegukana Super Cup ya Espagne ku nshuro ya 13 mu gihe uyu mukeba afite 14.

Vinicius yabaye umukinnyi wa mbere mu mateka y’iki gikombe cyakinwe kuva 1982 utsinze ibitego byinshi ku mukino wa nyuma.

Carlo Ancellotti yahaye Real Madrid igikombe cya 11 mu myaka ikabakaba itanu ari kuyitoza.

Kuva Carlo Ancellotti agarutse muri Real Madrid:

Imikino 145
Intsinzi 103
Ibikombe 7

Muri uyu mwaka w’imikino:

Imikino 28
Intsinzi 24
Gutsindwa 1
Ibitego yinjije 68
Ibitego yinjijwe 23