Ikipe ya Real Madrid yigaranzuye Manchester City iba ikipe ya mbere ya ruhago yinjije agatubutse mu mwaka w’imikino wa 2022-23.

Isesengura rya Deloitte ryerekanye ko Los Blancos yinjije miliyoni 723 z’amaapawundi, mu gihe Man City yageze kuri miliyoni £718.2.

Amakipe 20 ya mbere yabonye miliyari £8.97, ni ukuvuga izamuka rya 14%.

Muri uru rutonde,amakipe yo mu Bwongereza yongeye kwigaragaza mu kwinjiza akayabo nubwo anashora menshi ku isoko.

Isoko ryo kugura no kugurisha abakinnyi mu mpeshyi ryashimangiye imbaraga z’ifaranga mu Bwongereza kuko Sheffield United yashoboye gukoresha amafaranga menshi nka Borussia Dortmund mu gihe Brentford iri ku rwego rwa Inter Milan,gusa hejuru cyane, hari kizigenza udahangarwa Real Madrid.

Nkuko Deloitte’s Football Money League 2024 yabitangaje, amakipe akomeye muri Premier League yabonye ababarusha kwinjiza akayabo.

Real Madrid yagarutse ku mwanya wa mbere w’amakipe mu mafaranga yinjije mu mwaka w’imikino ushize. Nubwo itatwaye La Liga na Champions League iki gihangange cyo muri Espagne cyinjije miliyoni 831.4 z’amayero (£723m; $921m) mu gihe Manchester City yinjije €825.9m kandi yaratwaye ibikombe bitatu bikomeye.