REG WBBC yatsinze APR WBBC amanota 82-66, ibona intsinzi ya gatatu mu mikino ya nyuma ya Kamarampaka za Shampiyona ya Basketball mu Bagore.

Uyu mukino wa gatatu wabaye mu ijoro ryo ku wa Gatatu, tariki 9 Ukwakira 2024, muri Petit Stade i Remera.

REG WBBC yasabwaga gutsinda kugira ngo ikomeze yongere amahirwe yo kuzegukana Igikombe cya Shampiyona, mu gihe APR WBBC yo yarwanaga no kureba ko yahindura ibintu mu mikino isigaye.

REG WBBC yatangiye neza umukino, Kristina King na Victoria Reynolds batsinda amanota menshi. Agace ka mbere karangiye iyi kipe iyoboye n’amanota 24 kuri 13 ya APR WBBC.

Ikipe y’Ingabo yasubiranye imbaraga mu gace ka kabiri, Hosendove Taylor na Kamba Yoro Diakite batsinda amanota menshi ari nako igabanya ikinyuranyo.

Ntabwo byayoroheye kuko Destiney Philoxy yatangiye gutsinda amanota menshi cyane bitandukanye n’imikino iheruka.

Mu minota ibiri ya nyuma, APR yongeye kubona amanota igabanya ikinyuranyo gisigara ari amanota ane. Igice cya mbere cyarangiye REG WBBC iyoboye umukino n’amanota 41 kuri 37 ya APR WBBC.

Ikipe ya Sosiyete y’Igihugu ishinzwe Ingufu yongeye gutangirana imbaraga agace ka gatatu, Victoria na Philoxy bayitsindira amanota menshi.

Ni mu gihe Ikipe y’Ingabo yo yakomeje kugorwa cyane ko Diakite yaje no kuvunika. Aka gace REG yagatsinze ku manota 19-13.

Muri rusange, agace ka gatatu karangiye REG WBBC iyoboye umukino n’ikinyuranyo cy’amanota 10 (60-50).

Mu gace ka nyuma, Ikipe ya Sosiyete y’Igihugu ishinzwe Ingufu yarushijeho gutsinda amanota menshi, ibifashijwemo na Kristina, Uwitonze Nandy Linda na Micomyiza Rosine Cisse.

Umukino warangiye REG WBBC yatsinze APR WBBC amanota 82-66, itangira gukoza imitwe y’intoki ku Gikombe cya Shampiyona kuko yagize intsinzi eshatu ku busa.

Kristina King Morgan yatsinze amanota 21 anakora rebound 15.

Umukino wa kane uteganyijwe ku wa Gatanu, tariki 11 Ukwakira 2024 muri Petit Stade, aho Ikipe ya Sosiyete y’Igihugu ishinzwe Ingufu isabwa kuwutsinda ikegukana Igikombe cya Shampiyona yaherukaga mu 2022.

Muri iyi mikino ya nyuma, amakipe atanguranwa intsinzi enye mu mikino irindwi ishoboka.