Riyad Mahrez yaraye yerekeje mu ikipe ya Manchester City avuye muri Leicester City aguzwe akayabo ka miliyoni 60 z’amapawundi,asinya imyaka 5 ndetse ahita aca agahigo ko kuba umukinnyi uhenze kurusha abandi muri Afrika.

Sponsored Ad

Mahrez w’imyaka 27 ni umwe mu bakinnyi bafite impano y’umupira w’amaguru muri Afurika ndetse yagize uruhare runini mu gutuma ikipe ya Leicester City yari insina ngufi yegukana igikombe cya shampiyona mu mwaka wa 2016.

Riyad Mahrez wahawe nimero 26 yari asanzwe yambara no muri Leicester,yabwiye abafana ba Manchester City ko aje gufasha City kugera kuri byinshi ndetse yishimiye gukorana na Pep Guardiola.

Yagize ati “Ndishimye kuba ngeze muri City gukina umupira mwiza n’umutoza Pep Guardiola.Pep akina umupira usatira kandi nanjye niwo nkunda.Ndizera ko tuzatwara ibikombe byinshi mu myaka iri imbere kandi nizeye ko imikinire yanjye nihura n’imitoreze ya Pep tuzagera kuri byinshi.”

Riyad Mahrez yageze muri Leicester 2014,ayizamura mu cyiciro cya mbere ndetse aza kuyifasha kwegukana Premier League 2015/2016 aho yabaye umukinnyi w’umwaka mu Bwongereza.