Umwe mu bakinnyi bakomeye b’ikipe ya APR FC,Ruboeneka Jean Bosco,yatangaje ko kuba uyu mwaka w’imikino waratangiye nabi kuribo hari impamvu ebyiri zibyihishe inyuma.

Uyu mukinnyi wo hagati yabwiye ISIMBI ko gusezererwa nabi mu mikino ya CAF Champions League no kuba shampiyona y’uyu mwaka ikomeye aribyo byatumye batangira nabi.

Ati "Ntabwo ari ukutugora ni shampiyona ikomeye, ni shampiyona ikomeye, urebye urugendo twagize rwo muri Champions League urumva mu kuvayo gutyo hari ibitaragenze neza, ariko turimo kugenda tugaruka."

Ikipe ya APR FC yaraye itsinze bigoranye Mukura VS igitego 1-0,cyabonetse ku munota wa nyuma gitsinzwe na Victor Mbaoma umaze gutsinda ibitego 3 mu mikino 3 yikurikiranya.

Ikipe ya APR FC imaze gukina imikino 6 muri shampiyona aho yatsinzemo 4, inganya ibiri ya Marines FC na Bugesera FC.

Ubu niyo ya mbere ku rutonde rw’agateganyo n’amanota 14 irusha inota rimwe Musanze FC ya kabiri igomba kwakira Rayon Sports kuri iki cyumweru.