Rutahizamu w’Umunya Sudani Eid Mugadam Abakar Mugadam wari umaze igihe ategerejwe na Rayon Sports yageze i Kigali.

Uyu rutahizamu wagombaga kugera mu Rwanda mu cyumweru gishize,yahageze mu ijoro ryo kuri uyu wa Mbere tariki ya 14 Kanama 2023.

Mugadam w’imyaka 23 yageze i Kigali aho aje kwinjira mu ikipe ya Rayon Sports iri kwiyubaka mbere yo kwinjira mu marushanwa y’umwaka w’imikino 2023-2024.

Eid Mugadam ni umukinnyi ufite ubushobozi bwo gukina aca mu mpande zombi asatira izamu (Right and left Winger) ndetse akaba yanakina inyuma y’abataha izamu.

Amakipe yakiniye mbere y’uko Rayon Sports imuzanye mu Rwanda ni Al-Hilal na Al Ahly Shendi z’iwabo muri Sudan.

Kubera intambara ihari yahisemo kuza mu ikipe ya Rayon Sports aho aje gukorana n’umutoza Zelfani babanye.

Uyu mutoza ngo niwe wamurangiye Rayon Sports ndetse ngo amwitezeho ibitangaza kuko ngo ubwo bakoranaga yari umukinnyi ukomeye.

Biteganyijwe ko uyu mukinnyi arerekwa Abafana,kuri uyu wa Kabiri mu Nzove ubwo iyi kipe izaba ikina umukino wa Gicuti na Al-Merrikh.