Ikipe ya Sporting Kansas City yakinagamo Rwatubyaye Abdul yamaze gufata umwanzuro gutanga myugariro Rwatubyaye Abdul mu ikipe y’indi yitwa Colorado Rapids nayo ikina mu cyiciro cya mbere muri USA, imuguranamo umukinnyi wo hagati Benny Feilhaber wageze kuyikinira mbere muri 2013-17.

Nkuko ushinzwe gushakira amakipe Rwatubyaye Abdul witwa Simone Ghirlanda yabitangarije Radio 10,Rwatubyaye yagiye muri Colorado Rapids aguranwe umukinnyi Benny Feilhaber w’imyaka 34 wayitsindiye ibitego 33 mu mikino 180 yayikiniye kuva mu mwaka wa 2013 kugeza 2017.

Rwatubyaye wasinyishijwe na Sporting Kansas City muri Gashyantare uyu mwaka,yamaze kurekurwa nayo imuha ikipe ya Colorado Rapids isanzwe ikinamo icyamamare Tim Howard wahoze akinira amakipe akomeye mu Bwongereza arimo Manchester United na Everton.

Ikipe ya Colorado Rapids ibarizwa mu mujyi wa Denver iri mu makipe yiyubashye muri USA,kuko yigeze gutwara Major League Soccer muri 2010. Umunyezamu Tim Howard ni we Kapiteni wayo.

Ikipe ya Colorado Rapids Rwatubyaye yerekejemo,iri ku mwanya wa nyuma mu gice cy’iburengerazuba,kuko ifite amanota 2 mu mikino 10 imaze gukinwa.

Rwatubyaye yerekeje muri Colorado Rapids aguranwe umukinnyi witwa Benny Feilhaber