Kapiteni w’ikipe ya Real madrid,Sergio Ramos yasabye ubuyobozi bw’iyi kipe kutirukana umutoza Julen Lopetegui utari kubona umusaruso muri iyi minsi cyane ko ku munsi w’ejo nabwo yatsinzwe na Alaves igitego 1-0.

Real Madrid yaraye itsinzwe umukino wa 3 muri 4 iheruka gukina ndetse uku gutsindwa kose nta gitego na kimwe yinjiza byatumye ibinyamakuru byinshi bivuga ko Julen Lopetegui ashobora kwirukanwa isaha n’isaha.

Ramos yagiriye inama ubuyobozi bwa Real Madrid yo kutirukana Lopetegui

Kapiteni Ramos yasabye ubuyobozi bwa Real Madrid kugirira icyizere uyu mutoza ndetse bakamuha umwanya cyane ko n’abakinnyi be batari shyashya mu musaruro mubi iyi kipe ifite.

Yagize ati “Benshi bafata umwanzuro wo kwirukana umutoza iyo ari mu mazi abira gutya gusa si byiza guhindura umutoza.Tugomba gukomeza guhatana kuko umwaka w’imikino uracyari muremure,turacyafite urugendo rurerure.Uvuga ko Real Madrid yapfuye imusubiza nyuma y’igihe runaka.”

Nubwo Real Madrid yatsinzwe ku munsi w’ejo iracyanganya amanota na FC Barcelona ndetse na Alaves za mbere,gusa Barcelona ishobora kuzisiga niramuka itsinze Valencia uyu munsi.

Nyuma yo kugurisha Cristiano Ronaldo,Real Madrid yasubiye inyuma mu busatirizi kuko imaze imikino 4 itinjiza igitego ,ibintu byatangiye guca igikuba mu bafana bayo.