Ikipe ya Simba SC yatangaje ko yatandukanye na Roberto Oliveira Goncalves de Carmo "Robertinho", Umunya-Brézil wari umutoza wayo mukuru ndetse na Hategekimana Corneille, Umunyarwanda wari ushinzwe kongera ingufu z’abakinnyi.

Aba batoza batandukanye n’iyi kipe nyuma yo gutsindwa na Mucyeba wayo Yanga SC 5-1.

Daniel Cadena na Selemana Matola barayisigarana.

Ikipe ya Simba SC yavuze ko yatandukanye ku bwumvikane n’umutoza Roberto Oliveira.

Ubwo Robertinho yahabwaga akazi na Simba SC muri Mutarama uyu mwaka yari yaasabwe gusubiza ikuzo ikipe ya Simba SC igaca intege Yanga SC bahora bahanganye muri shampiyona y’icyiciro cya mbere mu gihugu cya Tanzania.

Robertinho watoje Rayon Sports akayivamo ayihesheje igikombe cya shampiyona,yerekeje muri Simba SC amaze gutandukana na Vipers SC yo muri Uganda nyuma yo kuyihesha igikombe cya shampiyona, akanayigeza mu matsinda ya CAF Champions League.