Uruganda rwenga ibinyobwa bisembuye n’ibidasembuye rwa SKOL Brewery rwatangije ku mugaragaro ukwezi kwahariwe ibirori by’umupira w’amaguru, ibikorwa byatangirijwe muri Camp Kigali kuri uyu wa 15 Kamena 2026, mu rwego rwo guha abakunzi b’uyu mukino uburyo bwo gukurikirana no kwishimira irushanwa rikomeye ku isi mu buryo budasanzwe.

Iki gikorwa cyiswe SKOL Football Village cyahurije hamwe abakunzi b’umupira w’amaguru baturutse hirya no hino muri Kigali, aho bashyiriweho ahantu hagari bafite za écran nini zibafasha gukurikira imikino imbonankubone mu mwuka w’ibirori n’imyidagaduro itandukanye. SKOL isanzwe ifite ubunararibonye mu gutegura ibikorwa nk’ibi byahurizaga abakunzi b’umupira ahantu hamwe kugira ngo basangire ibyishimo by’umukino.

Mu gutangiza uku kwezi kw’ibirori, abitabiriye bishimiye uburyo bwateguwe burimo kureba imikino ku mashusho manini, umuziki, amarushanwa y’imikino itandukanye ndetse n’ibindi bikorwa bigamije gutuma umufana wa ruhago agira ibihe byiza. Mu bihe by’irushanwa ry’umupira w’amaguru rikomeye ku isi. Camp Kigali yitezweho kuba imwe mu hantu h’ingenzi hahurira abakunzi b’umupira w’amaguru mu Rwanda.

Abateguye iki gikorwa bavuga ko intego ari ugukomeza guhuza Abanyarwanda binyuze muri siporo, no gutanga ubunararibonye bwihariye ku bakunzi b’umupira w’amaguru bazaba bakurikirana imikino y’Igikombe cy’Isi cya 2026.

Mu gihe amarushanwa akomeje, hateganyijwe ibikorwa bitandukanye bizajya bibera muri Camp Kigali mu gihe cy’ukwezi kose, birimo imyidagaduro, tombola n’andi marushanwa azafasha abafana kurushaho kuryoherwa n’ibi birori.

Uku gutangiza ukwezi kw’ibirori by’umupira w’amaguru bishimangira uruhare rwa SKOL Brewery Rwanda mu guteza imbere siporo no gushyigikira ibikorwa bihuza abantu binyuze mu mukino ukunzwe na benshi ku Isi.

SKOL Football Village izaba irimo ibikorwa bitandukanye byo gususurutsa abafana, birimo umukino wa sitting football, imikino ya kicker bakunze kwita baby-foot, gukina PS5, ndetse n’ibindi bikorwa by’imyidagaduro bizatuma abafana basangira ibyishimo by’umupira w’amaguru mu gihe cyose irushanwa rizaba rikomeje.

Kwinjira muri ibi birori ni amafaranga ibihumbi bibiri ariko ukaba wayafatamo icyo kunywa cya SKOL bikanaguhesha amahirwe yo kuba watsinda iyi tombora yo kuzatembera mu gihugu kizegukana irusha rikomeye ku isi.