Tottenham Hotspur yatsinze Manchester United igitego 1-0, yegukana UEFA Europa League ndetse kiba igikombe cya mbere itwaye mu myaka 17 ishize.

Sponsored Ad

Uyu mukino wa nyuma wabaye mu ijoro ryo ku wa Gatatu, tariki ya 21 Gicurasi 2025 i Bilbao muri Espagne.

Manchester United yahabwaga amahirwe kuko yari itaratsindwa muri iri rushanwa, mu gihe Tottenham na yo yari yitezwe kuko yari imaze kuyitsinda inshuro eshatu zose zahuye muri uyu mwaka w’imikino.

Tottenham Hotspur yatangiranye umukino imbaraga isatira bikomeye ariko umunyezamu André Onana n’ab’inyuma ba Manchester United bakabyitwaramo neza.

Mu minota 25, umukino wihutaga amakipe yombi asatirana ariko ntayirabasha kureba mu izamu.

Ku munota wa 30, Amad Diallo yazamukanye umupira mwiza acenga myugariro Destiny Udogie ahindura umupira imbere y’izamu, Micky van de Ven awukuramo.

Richarlison yazamukanye umupira mwiza, awutanga kwa Pape Matar Sarr awuhindura imbere y’izamu, Brennan Johnson afungura amazamu ku munota wa 42.

Igice cya mbere cyarangiye Tottenham Hotspurs yatsinze Manchester United igitego 1-0.

Mu gice cya kabiri, Manchester United yasatiriye bikomeye ariko kureba mu izamu bikaba ikibazo gikomeye.

Ku munota wa 68, iyi kipe yongeye kubura uburyo bukomeye bw’igitego, ku mupira wavuye kuri coup franc yatewe na Bruno Fernandes, umunyezamu Guglielmo Vicario ntiyawukomeza, Rasmus Højlund akina n’umutwe, Van de Ven awukuriramo ku murongo.

Ku munota wa 74, iyi kipe yongeye guhusha igitego, ku mupira Garnacho yazamukanye acenga ariko ateye ishoti umunyezamu Vicario ashyira umupira muri koruneri.

Muri iki gice, Tottenham ntabwo yongeye gukina nko mu cya mbere kuko yasubiye inyuma igacungira ku mipira Manchester United itakaje.

Mu minota y’inyongera, iyi kipe Manchester United yasatiriye cyane ndetse inahusha uburyo bubiri bukomeye.

Umukino warangiye Tottenham Hotspur yatsinze Manchester United igitego 1-0, yegukana UEFA Europa League.

Iyi kipe kandi yahise ibona n’itike yo kuzitabira UEFA Champions League mu mwaka w’imikino utaha.