Ikipe y’Igihugu y’u Butaliyani yatsinze u Bubiligi igitego 1-0, u Bufaransa bunganya na Israel ubusa ku busa byombi bibona itike ya ¼ muri UEFA Nations League.

U Butaliyani bwatsindiwe na Sandro Tonali ku mupira mwiza yahawe na Giovanni di Lorenzo ku munota wa 11.

U Bubiligi bwashatse igitego cyo kwishyura ariko umupira mwiza Wout Faes yahawe na Leandro Trossard awukinnye n’umutwe ukubita igiti cy’izamu uvamo.

Undi mukino wari uhanzwe amaso, ni uw’u Bufaransa bwanganyije na Israel ubusa ku busa mu rugo. Le Blues yateye amashoti 24 agana mu izamu ariko umunyezamu Daniel Peretz ayibera ibamba kuko yakuyemo amashoti umunani yaganaga mu izamu.

U Butaliyani n’u Bufaransa byabonye itike ya ¼, mu gihe ku Cyumweru amakipe yombi afitanye umukino wo kwishakamo uwa mbere. Ni mu gihe Israel n’u Bubiligi nabyo bizaba birwanira kutamanuka.

Indi mikino yabaye, u Bwongereza bwatsinze u Bugereki ibitego 3-0 bya Ollie Watkins, Curtis Jones. Norvège yatsinze Slovénie ibitego 4-1 birimo icya Erling Haaland ukomeza gukora amateka kuko cyari icya 35 mu mikino 38 amaze gukinira iki gihugu.

Iyi mikino irakomeza mu ijoro ryo ku wa Gatanu, aho Portugal irakira Pologne, Denmark ikine na Espagne, Écosse ikina na Croatie, mu gihe u Busuwisi bwakira Serbie. Imikino yose iteganyijwe saa 21:45.