Ikipe ya Juventus yaraye ikuweho amanota 15 mu yo yari ifite muri shampiyona y’u Butaliyani, bituma ihita ijya kumwanya wa 10 muri iyi shampiyona.

Sponsored Ad

Ni icyemezo cyategetswe n’urukiko rwo mu Butaliyani, nyuma y’iperereza mu by’ubukungu yari imaze igihe ikorwaho n’ubushinjacyaha bw’ishyirahamwe ry’Umupira w’amaguru.

Iryo perereza ryagaragaje ko Juventus yakoze nkana amakosa yerekeye kugura no kugurisha abakinnyi bayo.

Mu ntangiriro z’umwaka w’imikino ni bwo iriya kipe yo mu mujyi wa Turin yatangiye gukorwaho iperereza, ibyanatumye board yayo yose kugeza no kuri Perezida Pavel Nedved yegura.

Ni iperereza ryibanze ku mishahara y’abakinnyi ba Juventus mu mwaka wa 2020 n’uwa 2021, ubwo bari baremeye kugabanya imishahara yabo kubera icyorezo cya COVID-19.

Bivugwa ko ririya perereza ari ryo riremereye Juventus de Turin yari ikozweho mu mateka yayo, ku buryo ryari rinarenze icyiswe amahano ya Calciopoli yigeze gutuma iriya kipe imanurwa mu cyiciro cya Kabiri mu myaka yashize.

Iperereza Juve yakozweho ryakozwe n’ubushinjacyaha bw’ishyirahamwe ry’Umupira w’amaguru mu Butaliyani (FIGC), ariko ryabanje kwemezwa n’Urukiko rw’Ubujurire rwa kiriya gihugu.

Ku ikubitiro abashinjacyaha bari basabye ko Juventus ikurwaho amanota icyenda, gusa baza kuyongera bayageza kuri 15.

Byatumye iyi kipe igifite igihe cyo kujuririra kiriya cyemezo ihananuka ijya ku mwanya wa 10 ku rutonde rwa shampiyona n’amanota 22, ivuye ku wa gatatu yari iriho.

Juventus kuri ubu irarushwa amanota 25 na Napoli ya mbere, amanota bidashoboka ko yapfa gukuramo ngo itware igikombe imaze imyaka ibiri itazi, mu gihe kiriya gihano cyaba kigumishijweho.

Ivomo: Bwiza