Abahanga mu bijyanye n’iteganyagihe, bagaragaje ko mu gihe cy’imikino y’Igikombe cy’Isi cya 2026, hitezwe ubushyuhe budasanzwe mu mijyi izakira imikino yo muri Leta Zunze Ubumwe za Amerika, Mexique na Canada.

Harabura iminsi 28, ibihugu 48 bikomeye mu mupira w’amaguru biturutse ku migabane itandukanye ku Isi bigatangira guhatanira irushanwa ry’Igikombe cy’Isi cya 2026.

Ishyirahamwe ry’Abakinnyi b’Umupira w’Amaguru ku Isi (FIFPRO), ryakomeje kugaragaza ko ritewe impungenge n’ubuzima bw’abakinnyi bazitabira iri rushanwa.

Isesengura ryakozwe n’itsinda ry’abahanga ku mihindagurikire y’ikirere (World Weather Attribution) ryerekanye ko byibuze ¼ cy’imikino 104 izakinwa ishobora gusubikwa.

Ni nyuma y’uko ubushyuhe buzaba buri hejuru, byikubye kabiri uko byagenze mu Gikombe cy’Isi cyo mu 1994 na cyo cyabereye muri Leta Zunze Ubumwe za Amerika.

Hifashishijwe igipimo gipima ingaruka z’ubushyuhe (Wet Bulb Globe Temperature- WBGT), aba bahanga berekanye ko ubushyuhe buzagira ingaruka ku buzima bw’abakinnyi kugeza ubwo imibiri yabo itakaza ubushobozi bwo kubugabanya.

FIFPRO yeretse Ishyirahamwe ry’Umupira w’Amaguru ku Isi (FIFA), ko ubushyuhe buzarenga ‘degré Celsius’ 26, ariko bwagera kuri ‘degré Celsius’ 28 igasubika imikino.

FIFA yaganiriye n’ikinyamakuru Reuters, igaragaza ko hari ibyakozwe mu guhangana n’ikibazo cy’ubushyuhe cyatangiye kugaragazwa mu 2023, aho ivuga ko yashyizeho iminota itatu yo kunywa amazi muri buri gice cy’umukino.

Ibikorwaremezo by’umwihariko stade, byashyizwemo ibikoresho bigabanya ubushyuhe yaba mu myanya y’abafana cyangwa iy’abakinnyi, hanashyishyirwaho uburyo bw’ubutabazi bw’ibanze igihe hagaragaye ikibazo cyihariye cy’ubushyuhe ku muntu uwo ari we wese.

Nubwo bimeze bityo ariko, FIFPRO yerekana ko hakiri ibigomba gukorwa nko kongera iminota y’ikiruhuko nyuma y’igice cya mbere ikagera kuri 20 ivuye kuri 15, hakanatekerezwa ku bafana bazaba bari hanze y’izo stade, kugira ngo ubuzima bw’abakorerabushake n’abandi bazitabira iyi mikino butazajya mu kaga.

Igikombe cy’Isi kizatangira ku itariki ya 11 Kamena kugeza kuri 19 Nyakanga 2026, kikazabera mu mijyi 16 irimo 11 yo muri Leta Zunze Ubumwe za Amerika, itatu yo muri Mexique n’ibiri yo muri Canada.