Arsenal yatsinze Inter Milan ibitego 3-1, yandika amateka yo gutsinda imikino irindwi yikurikiranya muri UEFA Champions League.

Mu ijoro ryo ku wa Kabiri tariki ya 20 Mutarama 2026, ni bwo ku bibuga bitandukanye i Burayi hatangiye gukinwa imikino y’Umunsi wa Karindwi wa UEFA Champions League.

Umukino wari witezwe wabereye kuri kuri Stadio Giuseppe Meazza (San Siro) mu Butaliyani hagati ya Inter Milan na Arsenal

Ikipe ya Arsenal ni yo yatangiye neza umukino isatira bidatsinze ku munota wa 10, yafunguye amazamu ku gitego cyatsinzwe na Gabriel Jesus ku mupira yahawe na Julien Timbere awutera mu rushundura.

Nyuma y’iminota icyenda gusa, Inter Milan yakinaga neza yabonye igitego cyo kwishyura ku ishoti rikomeye ryatewe na na Petar Sucic ari inyuma y’uburuga rw’amahina, Umunyezamu David Raya ananirwa gukuraho umupira uruhukira mu izamu.

Ku munotwa 31, Arsenal yabonye igitego cya kabiri ku mupira wavuye kuri Koruneri ukurwaho na Leandro Trossard usanga Gabriel Jesus wari uhagaze neza awushyira mu izamu.

Ku munota wa 39, Inter Milan yabonye amahirwe yo kwishyura ku mupira wazamukanywe na Marcus Thuram, awuha Luis Henrique wari imbere y’izamu awuteye ujya hejuru.

Igice cya mbere cyarangiye Arsenal itsinze Inter Milan ibitego 2-1.

Inter Milan yongereye imbaraga mu gice cya kabiri isatira cyane izamu rya Arsenal ishaka igitego cyo kwishyura ariko ba myugariro n’umunyezamu bakomeza guhagarara neza.

Ku munota wa 84,Arsenal yatsinze igitego gatatu cyinjijwe na Victor Gyokores winjiye mu kibuga asimbuye

ku mupira yahawe na Bukayo Saka.

Umukino warangiye Arsenal itsinze Inter Milan ibitego 3-1, ihita ibona itike yo gukina imikino ya 1/8 cy’irangiza ndetse yandika amateka yo kumara imikino irindwi yikurikiranya itsinda mu irushwa ry’umwaka ikomeje kuyobora n’amanota 21.

Mu mikino yabanje, Kairat Almaty yo muri Kazakhstan yakiriye Club Brugge yo mu Bubiligi, inanirwa kwitwara neza iwayo ihatsindirwa ibitego 4-1.

Hakurikiyeho umukino wa Manchester City yo mu Bwongereza, aho yatsinzwe na FK Bodø/Glimt yo muri Norvège ibitego 3-1. Kasper Hogh yinjije ibitego bibiri, mugenzi we Jens Hauge ashyiramo icya gatatu.

Ni mu gihe icy’impozamarira cy’iyi kipe yo mu Bwongereza cyatsinzwe na Rayan Cherki mbere y’uko Rodri ahabwa ikarita itukura.

F.C. Copenhagen yanganyije na Napoli yo mu Butaliyani igitego 1-1 mu mukino Thomas Delaney w’iyi kipe yo muri Denmark yerekewemo ikarita itukura.

Indi mikino yabaye yasize Olympiacos F.C. itsinze Bayer Leverkusen ibitego 2-0, Sporting ntiyorohera Paris Saint-Germain yo mu Bufaransa iyitsinda ibitego 2-1, Tottenham yatsinze Borussia Dortmund ibitego 2-0, naho Villarreal itsindwa na Ajax ibitego 2-1 Ajax.

Viktor Gyökeres yishimira igitego cya gatatu cya Arsenal

Manchester City yatunguwe na Bodø/Glimt iyitsinda ibitego 3-1

Sporting yatunguye PSG iyitsinda ibitego 2-1

Arsenal yatsinze ibitego 3-1 ibimburira andi makipe kugera muri 1/8