Imikino ya UEFA Champions League yabaye mu Ijoro ryo ku wa 30 Mutarama 2025, yasize amakipe akomeye arimo Manchester City, Real Madrid, Bayern Munich, Paris Saint-Germain n’izindi, agomba gukina imikino ya kamarampaka kugira ngo abone itike ya ⅛.

Sponsored Ad

Imikino yakinwe ni iy’umunsi wa Munani wa UEFA Champions League, aho Manchester City yaherukaga gutsindwa na PSG yari yakiriye Club Brugge mu mukino ukomeye, zombi zishaka gukomeza mu makipe yazakina imikino ya kamarampaka.

Ni umukino Manchester City yatangiye neza ndetse igerageza gusatira izamu, ariko ba myugariro ba Club Brugge bakomeza guhagara neza.

Ku munota wa 45+1 rutahizamu wa Club Brugge Ferran Jutglà yatanze umupira ari mu rubuga rw’amahina kuri mugenzi we Raphael Onyedika, ahita awutereka mu rucundura. Hari ku munota wa 45 w’umukino ari na ko igice cya mbere cyarangiye.

Mu igice cya kabiri abakinnyi ba Pep Guardiola bagitangiranye imbaraga ndetse ku munota wa 53, Mateo Kovačić yari yamaze kwishyura iki gitego, nyuma y’indi minota 10, Joel Ordonez yitsinda ikindi bahita bayobora umukino.

Iyi kipe yo mu Bwongereza yashyizemo ikindi gitego cyabonetse ku munota wa 77, cyinjijwe na Savinho aherejwe umupira na John Stones, gituma umukino urangira ari 3-1, ishimangira itike yo gukina kamarampaka.

Real Madrid yatakaje amahirwe yo kujya mu makipe umunani meza nubwo yanyagiye Brest ibitego 3-0, gusa igasoreza ku mwanya wa 11.

Liverpool yarangije imikino yayo iri ku mwanya wa mbere nubwo yatsinzwe na PSV ibitego 3-2, uba umukino wa mbere itsinzwe kuva iri rushanwa ryatangira.

Amakipe yabonye itike yo kuzakina imikino ya ⅛ ni Liverpool, Barcelona, Arsenal, Inter Milan, Atletico Madrid, Bayer Leverkusen, Lille na Aston Villa.

Mu makipe azabanza gukina kamarampaka kugira ngo abone itike ni Atalanta, Borussia Dortmund, Real Madrid, Bayern Munich, AC Milan, PSV, PSG, Benfica, Monaco, Brest, Feyenoord, Juventus, Celtic, Man City, Sporting na Club Brugge.

Amakipe yasezerewe ni Dinamo Zagreb, Stuttgart, Shakhtar Donetsk, Bologna, Crvena Zvezda, Sturm Graz, Sparta Prague, RB Leipzig, Girona, Salzburg, Slovan Bratislava na Young Boys.

Tombola y’uko amakipe azahura mu mikino ya kamarampaka ku makipe yo kuva ku mwanya wa cyenda kugeza kuri 24, iteganyijwe tariki ya 31 Mutarama 2025, i Nyon mu Busuwisi.