Abakinnyi b’Abanyarwanda bakomeje gushyira imbaraga nyinshi mu gufasha amakipe yabo by’umwihariko abakina hanze, mbere yo guhamagarwa mu ikipe y’Igihugu “Amavubi” yitegura imikino ya FIFA Series izabera i Kigali muri Werurwe 2026.

Ku Cyumweru, tariki ya 8 Gashyantare 2026, Al Masry SC yo mu Misiri ikinamo Mugisha Bonheur yatsinzwe na Kaizer Chiefs ibitego 2-1 mu mukino wa gatanu mu y’amatsinda ya CAF Confederations Cup.

Uyu Munyarwanda ukina hagati yugarira ntiyari mu bakinnyi bakoreshejwe muri uyu mukino.

Nairobi United ikinamo Buregeya Prince na Hakizimana Muhadjiri yatsindiwe mu rugo na Wydad Casablanca yo muri Maroc, yuzuza umukino wa gatanu wikurikiranya idatsinda mu mikino yo mu itsinda rya kabiri mu y’amatsinda ya CAF Confederations Cup.

Muri uyu mukino Hakizimana Muhajdri yinjiye mu kibuga asimbuye ku munota wa 76 mu gihe myugariro Buregeya Prince atari mu bakinnyi bakoreshejwe kubera ikibazo cy’imvune afite.

Zire FK yo mu cyiciro cya mbere muri Azerbaijan ikinamo Mutsinzi Ange Jimmy, yatsinze Sumqayit FK mu mukino w’umunsi wa 19 wa Shampiyona, ifata umwanya wa gatatu n’amanota 32. Uyu myugariro w’Umunyarwanda yakinnnye umukino wose.

Samuel Gueulette ukina muri RAAL La Louvière mu cyiciro cya mbere mu Bubiligi, yinjiye mu kibuga asimbuye ku munota wa 63 mu mukino w’umunsi wa 24 wa Shampiyona batsinzwemo na Royale Union Saint-Gilloise ibitego 2-1. Uyu Munyarwanda ukina hagati asatira ntiyari mu bakinnyi bakoreshejwe.

Kapiteni Djihad Bizimana uherutse kwerekeza muri CS Constantine yo mu cyiciro cya mbere muri Algeria yinjiye mu kibuga asimbuye ku munota wa 74 mu mukino ikipe ye yatsinzemo MB Rouisat ibitego 2-1 mu mukino w’umunsi wa 18 wa Shampiyona, ifata umwanya wa kabiri n’amanota 29 irushwa na MC Alger ya mbere amanota arindwi.

Myugariro Manzi Thierry ukinira Al Ahly Tripoli yo mu cyiciro cya mbere muri Libya yakinnye umukino wose banganya na Swehly SC ubusa ku busa mu mukino w’umunsi wa cyenda wa Shampiyona.

Myugariro Nsabimana Aimable na Ishimwe Anicet ukina asatira anyuze mu mpande bakinira Assabah SC yo muri iyi Shampiyona yatsinze Al Madina igitego 1-0, mu mukino Nsabimana Aimable yakinnyemo iminota yose

Muri iyi shampiyona kandi, ikipe ya Al Saqour ikinamo Rwatubabye Abdul yatsinzwe na Al Hilal Benghazi ibitego 3-1. Uyu myugariro w’Umunyarwanda yabanje mu kibuga akina umukino wose.

Rutahizamu Gitego Arthur ukinira Fus Rabat yo mu cyiciro cya Mbere muri Maroc yanganyije na Olympique Dcheira igitego 1-1, uyu Munyarwanda ntiyari mu bakinnyi bakoreshejwe muri uyu mukino.

Myugariro Emmanuel Imanishimwe ukinira AEL Limassol yo mu cyiciro cya mbere muri Cyrus we na bagenzi be bari kwitegura umukino wa Shampiyona bakinamo na Krasava ENY kuri uyu wa Mbere, tariki ya 9 Gashyantare 2026.

Muhire Kevin ukinira Jamus SC yo mu cyiciro cya mbere muri Sudani y’Epfo yanyagiye Lion Hunters ibitego 5-0, mu mukino uyu Munyarwanda yinjiye mu kibuga asimbuye ku munota wa 68.

El Merrikh Bentiu na yo muri iyi Shampiyona ikinamo Ishimwe Saleh na Serumugo Ali iri kwitegura umukino wa Shampiyona izakinamo na Salam Aweil FC ku wa 11 Gashyantare 2026.