Ku wa Gatandatu taliki ya 27 Ukwakira 2018 saa mbili n’igice z’umugoroba, nibwo indege ya kajugujugu yari itwaye umuherwe nyiri ikipe ya Leicester City yo mu Bwongereza,umunya Thailand Vichai Srivaddhanaprabha, yahiriye hafi y’ikibuga cya King Power iyi kipe ikiniraho,igwa muri Parking nyuma y’aho moteri yayo yagiriye ikibazo.

Nkuko byaraye byemejwe na polisi yo mu mujyi wa Leicester ndetse n’iyi kipe,uyu muherwe n’abandi bantu 4 bari kumwe bitabye Imana nyuma y’iyi mpanuka y’indege.

Nyuma yo kureba umukino ikipe ye ya Leicester City yari imaze kunganyamo na Westham igitego 1-1,indege ya kajugujugu ya chairman wa Leicester, Vichai Srivaddhanaprabha yaje kumufata ku kibuga nkuko byari bisanzwe igeze mu kirere moteri irahagarara byatumye iyi ndege ihita ishya we n’abakozi be 4 bahita bapfa.

Ibihumbi n’ibihumbi by’abafana ba Leicester biriwe ku kibuga cya King Power,Leicester City ikiniraho bazanye indabo ndetse no gusengera uyu muherwe wabo wabakoreye ibitangaza bakegukana shampiyona y’Ubwongereza muri 2016.

Umunya Thailand Vichai Srivaddhanaprabha wari nyiri Leicester City yavutse taliki ya 4 Mata 1958 avukira mu mujyi wa Bangkok.

Yaguze Leicester City mu mwaka wa 2010 akayabo ka miliyoni 39 z’amapawundi ari agakipe gaciriritse kakinaga mu cyiciro cya 3, ayifasha gukora amateka ubwo yatwaraga igikombe cya Premier League bitunguranye mu mwaka wa 2016.

Srivaddhanaprabha wari ufite imyaka 60, asize umugore n’abana 4 ndetse ikinyamakuru Forbes gikunze gukora intoned z’abantu bafite agatubutse,giherutse gutangaza ko yari atunze akayabo ka miliyari zisaga 4 z’amadolari.

Abakinnyi batandukanye barimo aba Leicester City,anakipe atandukanye ndetse n’abafana hirya no hino ku isi bababajwe n’urupfu rw’uyu muherwe binyuze mu butumwa bashyize ku mbuga nkoranyambaga.

Umukino wagombaga guhuza Leicester City na Southampton muri Carabao Cup wasubitswe kubera urupfu rw’uyu muherwe.