Umunyabigwi muri Tennis, Roger Federer, yemeje ko igikombe cya Laver Cup 2022 aricyo cya nyuma azakina mu mwuga we hanyuma agasezera ku mugaragaro
Kuri uyu wa kane,tariki ya 15 Nzeri 2022,nibwo Federer wakunzwe kurusha abandi bakinnyi bose mu mukino wa Tennis, yatangarije ku mbuga nkoranyambaga ko atazongera gukina uyu mukino nk’uwabigize umwuga.
Yavuze ko atazongera kugaragara mu marushanwa 4 akomeye muri Tennis akinwa buri mwaka [Grand Slams] n’ibindi bikombe bitandukanye byitabirwa (...)

Sponsored Ad

Umunyabigwi muri Tennis, Roger Federer, yemeje ko igikombe cya Laver Cup 2022 aricyo cya nyuma azakina mu mwuga we hanyuma agasezera ku mugaragaro

Kuri uyu wa kane,tariki ya 15 Nzeri 2022,nibwo Federer wakunzwe kurusha abandi bakinnyi bose mu mukino wa Tennis, yatangarije ku mbuga nkoranyambaga ko atazongera gukina uyu mukino nk’uwabigize umwuga.

Yavuze ko atazongera kugaragara mu marushanwa 4 akomeye muri Tennis akinwa buri mwaka [Grand Slams] n’ibindi bikombe bitandukanye byitabirwa n’ababigize umwuga muri uyu mukino [ATP masters] nyuma y’igikombe cya Laver, kizabera mu cyumweru gitaha kuri O2 Arena i Londres.

Uyu mugabo w’imyaka 41 y’amavuko asezeye amaze gutwara Grand Slams 20 n’ibikombe 103 bya Tennis muri rusange.

Uyu musuwisi w’umuhanga cyane yari amaze igihe kinini afite imvune y’ivi yanze gukira ndetse nta rushanwa na rimwe yitabiriye uyu mwaka.

Mu butumwa burebure, Federer yashimye buri wese wamufashije mu mwuga we kandi agaruka ku rugendo rudasanzwe yagiye muri iyi siporo.

Ati"Ku muryango wanjye wa Tennis , umuryango ndetse n’abandi. Mu mpano zose Tennis yampaye mu myaka yashize, ikomeye, nta gushidikanya, ni abantu nahuye nabo

Inshuti zanjye, abo twahanganye, ndetse cyane cyane abafana baha siporo kubaho. Uyu munsi, ndashaka kubagezaho amakuru mwese.

"Nkuko benshi mubizi, imyaka itatu ishize nahuyemo n’imbogamizi nyinshi zirimo imvune ndetse no kubagwa. Narakoze cyane kugira ngo ngaruke mu buryo bwuzuye bwo guhatana. Ariko kandi nzi ubushobozi bw’umubiri wanjye n’imbibi,kandi ubutumwa bwawo kuri njye burumvikana.

Mfite imyaka 41, nakinnye imikino irenga 1500 mu myaka 24, tennis yamfashe neza kurenza uko nabitekerezaga, none ngomba kumenya igihe nyacyo cyo kurangiza umwuga wanjye wo guhatana.

Igikombe cya Laver mu cyumweru gitaha i London kizaba ari cyo gikorwa cyanjye cya nyuma cya ATP. Birumvikana ko nzakina Tennis nyinshi mu bihe biri imbere, ariko ntabwo azaba ari muri Grand Slams cyangwa mu kuzenguruka hirya no hino.

Iki ni icyemezo kibabaje kuko nzakumbura ibyo ingendo zose zampaye, ariko ku rundi ruhande, hari byinshi byo kwishimira. Nibwira ko ndi umwe mu bantu bagize amahirwe ku isi, nahawe impano idasanzwe yo gukina Tennis, kandi nabikoze ku rwego ntigeze ntekereza ko nzageraho."

Uyu mukinyi wimyaka 41 ntabwo yongeye gukina kuva asezerewe muri kimwe cya kabiri cya Wimbledon 2021 akabagwa ivi ku nshuro ya gatatu.

Azasezerera mu gikombe cya Laver kizabereye i London,kuva ku ya 23-25 ​​Nzeri aho azaba ari mu ikipe y’Uburayi hamwe n’inshuti ye magara,Rafael Nadal,na Novak Djokovic bahanganye cyane.

Mu mwuga we udasanzwe, Federer yakusanyije ibikombe bitandatu bya Australian Open, umunani bya Wimbledon, ibikombe bitanu bya US Open ndetse na French Open imwe.

Yatwaye bya nyuma bya ATP inshuro esheshatu ndetse anegukana umudari wa zahabu mu mikino Olempike yo mu 2008 ari kumwe na mugenzi we Stanislas Wawrinka mu bakina ari babiri, mu gihe ikipe ye y’Ubusuwisi yatwaye igikombe cya Davis mu 2014.Yamaze ibyumweru 237 ari nimero ya mbere ku isi ndetse yari amaze imyaka isaga 20 atorwa n’abafana nk’umukinnyi ukunzwe kurusha abandi bose muri Tennis.