Umunya-Kenya Laban Korir yegukanye ’Kigali International Peace Marathon 2024’ yabaga ku nshuro ya 19 mu bagabo, akurikirwa na mwenewabo Cornelius Kipeti Kiplagat.

Sponsored Ad

Yanikiye abarenga 1000 basiganwaga muri iki cyiciro cy’ibilometero 42.195.

Minisitiri wa Siporo, Munyangaju Aurore Mimosa,Minisitiri w’Ubutegetsi bw’Igihugu, Musabyimana Jean Claude, Umuyobozi w’Umujyi wa Kigali, Dusengiyumva Samuel, Umuyobozi Mukuru Wungirije wa RDB, Mukazayire Nelly n’abandi bayobozi bitabiriye iri rushanwa ndetse basiganwa mu cyiciro cya Run for peace.

Ange Kagame nawe ari mu bitabiriye Marato Mpuzamahanga ya Kigali ibaye ku nshuro ya 19.Yasiganwe mu bakina bishimisha.

Korir Laban yegukanye Marato Mpuzamahanga ya Kigali muri Full Marathon mu cyiciro cy’abagabo akoresheje amasaha 2,iminota 16 n’amasegonda 06 ku ntera y’ibilometero 42.195.

Yakurikiwe na Kiplagat Cornelus Kibet [2:16:18], Mengich Moses [2:18:38], Chemweno Micah Kipkosgei [2:18:46] mu gihe Umunyarwanda wasoreje hafi ari Hitimana Noel wakoresheje 2:19:01 ku mwanya wa gatanu.

Joan Kipyatich yegukanye Kigali International Peace Marathon 2024 mu cyiciro cy’abagore muri ‘Full Marathon’, akoresheje 2:33:27.

Uyu Munya-Kenya yahigitse Maseret Abebayehu [2:36:08], Florence Chepsoi Jepkosgei [2:39:34], Sheila Chepkech [2:43:26] na Bebaynesh Ayele [2:43:32].

Muri iri rushanwa,ababanje guhaguruka ni abasiganwa muri ‘Full Marathon’ y’ibilometero 42.195, Half Marathon ya 21.098 Km.

Abasiganwe muri Full Marathon bari 1,142 barimo abanyamahanga 820 mu gihe abasiganwa muri Half Marathon ari 3,605 barimo abanyamahanga 1,716.

Muri rusange mu cyiciro cy’abagabo, Francis Kipkorir Langat wo muri Kenya ni we wegukanye Half Marathon aho yakurikiwe na mugenzi we na we wo muri Kenya, Leonard kipkoech Langat mu gihe Umunyarwanda Mutabazi Emmanuel yabaye uwa Gatatu.

Mu cyiciro cy’abagore, Winfridah Moraa Moseti wo muri Kenya ni we wegukanye Half Marathon akurikirwa na Vivian Jepkogei Cheruiyot na we wo muri Kenya mu gihe Umunyarwandakazi Imanizabayo Emeline ari we waje ku mwanya wa Gatatu.

Muri rusange abitabiriye Marato Mpuzamahanga ya Kigali baturutse mu bihugu 35 birimo Canada, Denmark, Pologne, u Butaliyani, Brazil, Jamaica, Singapore, Nigeria, Ghana n’ibindi.

Imibare iheruka igaragaza ko abari biyandikishije ari 10,183 barimo abanyamahanga 4,001 mu gihe abandi 6,182 basigaye ari Abanyarwanda ndetse n’ababa mu Rwanda.