Umunyarwanda ukina umukino wo gusiganwa ku maguru, Hakizimana John, yahangaye n’Abanya-Ethiopia yegukana umudali w’Umuringa mu isiganwa rya Dubai Marathon.

Ni isiganwa ryakinwe ku Cyumweru, tariki ya 1 Gashyantare 2026, riba mu byiciro by’abasiganwa babigize umwuga ndetse n’abasiganwa bishimisha mu mihanda yo mu Mujyi wa Dubai muri Leta Zunze Ubumwe z’Abarabu.

Hakizimana ni umwe mu babigize umwuga bari bari guhatana muri iri rushanwa, gusa akaba yari ahanganye n’abakinnyi bakomeye barimo abo muri Kenya na Ethiopia.

Uyu mukinnyi yagerageje kwitwara neza mu isiganwa, kuko kuva ku bilometero 10 bya nyuma yari mu bariyoboye, ndetse agera mu bilometero 25 ari umukinnyi wa kabiri inyuma ya Geleta Jiregna wo muri Ethiopia.

Uyu mukinnyi yasoje isiganwa ku bilometero 40 ari ku mwanya wa gatatu, yakoresheje amasaha abiri, iminota itandatu n’amasegonda ane, imbere ye hari Haji Yasin na Melak Nibret bo muri Ethiopia.

Abakinnyi batatu bo muri Ethiopia kandi ni bo bitwaye neza muri Dubai Marathon 2026 mu cyiciro cy’abagore, aho hayoboye Dessie Anchinalu, Dekebo Muliye na Worku Fantu.

Hakizimana John yitwaye neza mu isiganwa ryo ku maguru rya Dubai Marathon 2026